त्रिशूलीले बस्ती नै सोहोरेको १० दिन पछि बेत्रावतीबाट एक महिलाको उद्धार भएको छ।
शनिबार दिउँसो करिब साढे १ बजे नुवाकोटतर्फ विदुर नगरपालिका-१० स्थित बेत्रावतीमा माथिल्लो तलाको आधा भाग मात्रै पुरिन बाँकी रहेको एउटा घरबाट अन्दाजी ६५ वर्षकी चन्डिका श्रेष्ठलाई उद्धार गरिएको हो।
नेपाल प्रहरी र सशस्त्र प्रहरीको टोलीले उनलाई उद्धार गरी अहिले काठमाडौं लगिएको छ।
उद्धार गरिएकी चन्डिका स्थानीय आनन्द श्रेष्ठकी श्रीमती हुन्। उनलाई उद्धार गरेपछि अहिले हेलिकप्टरबाट काठमाडौं पठाइएको सशस्त्रका सह प्रवक्ता डिएसपी शैलेन्द्र थापाले जानकारी दिए।
चन्डिका त्यही घरमा भएको कसरी पत्ता लाग्यो भनेर हामीले नुवाकोटतर्फको बेत्रावतीमा खोजी तथा उद्धारमा खटिएका सशस्त्रका फिल्ड कमान्डर इन्स्पेक्टर सुमन विश्वकर्मासँग कुराकानी गरेका छौं।
इन्स्पेक्टर विश्वकर्माका अनुसार त्यहाँ रहेको घर भदौ १० गतेको बाढीले सय मिटर माथिबाट बगाएर ल्याएको घर हो। घर चार तलाको छ। तर बाढीले ल्याएको लेदो र गेग्रानले पुरेको छ। चौथो तल्लाको आधा भाग मात्रै देखिएको छ।
खोजीकै क्रममा दिउँसो आवाज आएपछि टोली त्यसतर्फ गएको उनले बताए।
'बचाऊ बचाऊ भनेको आवाज आयो,' उनले भने, 'इको आए जसरी कहाँ-कहाँबाट हो आवाज आएजस्तो भयो। त्यसपछि त्यहाँ छिरेका हौं,'
आवाज आएपछि घरको माथिल्लो भागमा सानो झ्यालजस्तो रहेको ठाउँ फुटाएर उद्धार टोली प्रवेश गरेको उनले बताए।
बाढीले घरसहित बगाएपछि महिला बेहोस् भएको र अहिले होस आएको हुन सक्ने बताए।
'सुरूवातकै दिनदेखि यो क्षेत्रमा आउँदै सर्च गर्यौं। शायद उहाँ बेहोस् हुनुहुन्थ्यो की। केही आवाज आएको थिएन। आज अचानक आवाज सुनिएपछि हामीले तुरून्त रेस्क्यु गर्यौं,' उनले भने।
उद्धारकर्मी नजिक पुगेपछि चण्डिकाले पानी मागेकी थिइन्।
'हामीले नआँत्तिनुस् भन्यौं र उद्धार गरेर हेलीमा राखी काठमाडौं पठायौं,' इन्स्पेक्टर विश्वकर्माले भने।
बेत्रावतीमा रहेका अरू १५/२० वटा घरहरूमा पनि निरन्तर खोजी भइरहेको उनले बताए।
-1788603155.png)
-1746009348.jpg)
