नक्कली शैक्षिक प्रमाणपत्र पेस गरेको अभियोगमा राष्ट्रिय अनुसन्धान विभागका प्रमुख अनुसन्धान अधिकृत ठाकुर प्रसाद केसीविरुद्ध भ्रष्टाचार मुद्दा दायर गरिएको
अख्तियार दुरुपयोग अनुसन्धान आयोगले बुधबार विशेष अदालतमा केसीविरुद्ध मुद्दा दायर गरेको हो।
सुरक्षा निकायका कर्मचारीले झुट्टा प्रमाणपत्रका आधारमा जागिर र बढुवा लिएको उजुरीमाथि छानबिन गर्दा केसीको प्रमाणपत्र नक्कली भेटिएको अख्तियारका प्रवक्ता सुरेश न्यौपानेले जानकारी दिए।
उनका अनुसार केसीले भारतको उत्तर प्रदेशस्थित माध्यमिक शिक्षा परिषद् (बोर्ड अफ हाई स्कुल ऐण्ड इण्टरमीडिएट एजुकेशन यु.पी.) बाट जारी हाईस्कुल परीक्षाको नक्कली प्रमाणपत्र पेस गरेका थिए।
सोही प्रमाणपत्रका आधारमा सुरुमा सहायक निरीक्षक पदमा नियुक्ति लिएका थिए। त्यसपछि पनि उनले सोही नक्कली प्रमाणपत्र पेस गर्दै पटक-पटक पदोन्नति लिएका अख्तियारको आरोप छ।
उनी २०६६ सालमा वरिष्ठ अनुसन्धान सहायक, २०७३ मा अनुसन्धान अधिकृत र २०८१ मा प्रमुख अनुसन्धान अधिकृत पदमा बढुवा भएका थिए। उनले गैरकानुनी रूपमा हैसियत, लाभ र सुविधा प्राप्त गरेको प्रवक्ता न्यौपानेले जानकारी दिए।
-1746009348.jpg)
