नेपालमा अन्तर्राष्ट्रिय वास्तुकला सम्मेलन ‘पाथफाइन्डर २०२६’ आयोजना हुने भएको छ।
आगामी नोभेम्बर २२ मा काठमाडौंमा आयोजना हुने सम्मेलनमा स्पेनका प्रसिद्ध वास्तुविद् पाउ मिलेट लोपेजसहित इटालीका प्रविधि विशेषज्ञहरूको सहभागिता रहनेछ।
वास्तुविद् लोपेज स्पेनको बार्सिलोनास्थित विश्वप्रसिद्ध साग्रादा फामिलिया निर्माण परियोजनाको प्राविधिक कार्यालयका पूर्वप्रमुख हुन्।
‘एक्सप्लोरिङ आइडियाज, इन्स्पायरिङ डिजाइन’ (नयाँ विचारको खोजी, डिजाइनमा प्रेरणा) भन्ने मूल नाराका साथ आयोजना हुन लागेको सम्मेलनमा नेपालका करिब २०० जना वास्तुविद्, इन्टेरियर डिजाइनर तथा प्राज्ञिक क्षेत्रका प्रतिनिधिहरू सहभागी हुने अपेक्षा गरिएको छ।
सम्मेलनमा वास्तुकला, डिजाइन तथा निर्माण सामग्रीमा भइरहेका नवीन प्रयोग र विकासबारे विचार तथा अनुभव आदानप्रदान गरिनेछ।
विश्वकै चर्चित वास्तुकला परियोजनामध्ये एक साग्रादा फामिलियासँग सम्बन्धित कामको अनुभव हासिल गरेका लोपेजले उक्त संरचनाको वास्तुकलासम्बन्धी परिकल्पना तथा डिजाइन, इन्जिनियरिङ र शिल्पकलाबीचको अन्तरसम्बन्धबारे आफ्ना अनुभव र दृष्टिकोण प्रस्तुत गर्नेछन्।
कार्यक्रममा इटालीको सिस्टम सेरामिक्सका फ्रान्सेस्को पियानी र कलरोबिया ग्रुपका एलेसियो लोन्डीको पनि सहभागिता रहनेछ। उनीहरूले सेरामिक उत्पादन प्रविधि, निर्माण सामग्री तथा सतहसम्बन्धी प्रविधिमा भएका नयाँ विकासले आधुनिक वास्तुकलामा कसरी थप सम्भावना सिर्जना गरिरहेका छन् भन्ने विषयमा प्रस्तुति दिनेछन्।
नेपालका प्रतिष्ठित वास्तुविद् वीरेश शाहले सम्मेलनको अध्यक्षता गर्नेछन्। उनले अन्तर्राष्ट्रिय वक्ताहरू र नेपाली वास्तुकला समुदायबीच हुने छलफल तथा विचार आदानप्रदानको सहजीकरण गर्नेछन्।
सम्मेलनले विश्वका विभिन्न वास्तुकला परियोजनाबाट प्राप्त अनुभव, प्रविधिमा भएका नवीन विकास तथा निर्माण सामग्रीमा आएको परिवर्तनलाई नेपालको समकालीन वास्तुकला र डिजाइन अभ्यासमा कसरी उपयोग गर्न सकिन्छ भन्ने विषयमा संवादलाई प्रोत्साहन गर्ने उद्देश्य राखेको छ।
लुम्बिनी सेरामिक्स लिमिटेडको सेरामिक टायल ब्रान्ड ‘लामिनार’ ले व्यावसायिक ज्ञान तथा अनुभव आदानप्रदान र वास्तुकलासम्बन्धी नयाँ सोच तथा प्रेरणा प्रदान गर्ने मञ्चका रूपमा ‘पाथफाइन्डर’ सम्मेलन आयोजना गर्न लागेको हो।
सम्मेलनको अन्त्यमा अन्तरक्रियात्मक छलफल आयोजना गरिनेछ।
उक्त सत्रमा सहभागीहरूले अन्तर्राष्ट्रिय वक्ताहरूसँग प्रत्यक्ष संवाद गर्ने तथा आफ्ना जिज्ञासा र विचार प्रस्तुत गर्ने अवसर पाउनेछन्।