टियु मैदानमा सचिन तेन्दुलकरको टिम विजयी (तस्बिरहरू)

निशा भण्डारी

काठमाडौं, कात्तिक ३०

नेपाल आएका भारतका पूर्व क्रिकेटर सचिन तेन्दुल्करले कीर्तिपुरस्थित टियू मैदानमा क्रिकेट खेलेका छन्।

बालअधिकार सम्बन्धि महासन्धी पारित भएको ३० वर्ष पुरा भएको उपलक्ष्यमा युनिसेफ नेपालले आयोजना गरेको मैत्रीपूर्ण क्रिकेट खेलमा सचिनको टिम निलोले नेपालका पूर्वकप्तान विनोद दासको टिम रातोलाई ९ विकेटले पराजित गर्‍यो।

युनिसेफका सद्भावनादूत सचिनले टस जितेर पहिले फिल्डिङ गर्ने निर्णय गरेको थिए।

त्यसपछि ब्याटिङमा उत्रिएको विनोदका टिमले ८ ओभरमा ४ विकेट गुमाउँदै ४४ रन बनाएको थियो।

त्यसक्रममा सचिनले सुरुमा विकेटकिपिङ गरेका थिए भने पछि एक ओभर बलिङ गरेका थिए। सचिनले सँगै टिममा रहेका स्कुलका बालबालिकालाई बलिङ तथा ब्याटिङ गर्न प्रोत्साहन गरेका थिए।

जवाफी ब्याटिङ गरेको सचिनको टिमले १ विकेटको क्षतिमा ६ ओभरमा लक्ष्य पूरा गरेको थियो। त्यसक्रममा सचिनले ब्याटिङ गरे। उनले ७ रन बनाएपछि मैदान छाडेर आफ्ना टिममा रहेका अन्य बालबालिकालाई खेल्ने मौका दिएका थिए।

खेलपछि सचिनले आफूले खेलबाट मनोञ्जन लिएको बताए। उनले बालबालिकाको अधिकारको विषयमा वाकालत गर्ने कार्यक्रममा सहभागी हुन पाएकोमा खुसी लागेको बताए। साथै उनले बालबालिकालाई काम लाग्न स्वतन्त्र छाडिदिनु पर्ने बताउँदै भने, 'बालबालिकालाई स्वतन्त्र छाडिदिनुस्। गल्ति गरेकोमा गाली नगर्नुस्। गल्ती सुधार गर्नका लागि प्रोत्सहान गर्नुस्।'

सचिन शुक्रबार राति नेपाल आइपुगेका थिए। उनी आजै भारत फर्कने बताइएको छ।

तस्बिरहरु : निशा भण्डारी