आइपिएलमा चेन्नई सुपरकिंग्सले चौथो हार बेहोरेको छ। बुधबार अबुधाबीमा भएको खेलमा चेन्नईलाई कोलकता नाइटराइडर्सले १० रनले पराजित गरेको हो।
कोलकताको भने यो तेस्रो जित हो। कोलकता तेस्रो जितसहित अंक तालिकाको तेस्रो स्थानमा उक्लिएको छ।
टस जितेर पहिले ब्याटिङ गरेको कोलकता २० ओभरमा १६७ रनमा अलआउट भयो।
कोलकताका लागि ओपनर राहुल त्रिपाठीले ८१ रनको योगदान दिए। उनले ५१ बलमा ८ चौका र ३ छक्का हिर्काए। शुभमान गिल ११ रनमा आउट भए भने सुनील नारिनले १७ रन भन्दा बढी जोड्न सकेनन्।
कोलकताविरुद्ध चेन्नईका डिजे ब्राभोले ३ विकेट लिए। यस्तै कर्ण शर्मा, शार्दुल ठाकुर र साम कुरानले २-२ विकेट लिन सफल भए।
१६८ रनको लक्ष्य पछ्याएको चेन्नईले ५ विकेटको क्षतिमा १५७ रन मात्र जोड्न सक्यो।
ओपनर सेन वाट्सनले ५० रन जोडे भने अम्बाती रायदुले ३० रन बटुले। कप्तान महेन्द्रसिंह धोनीले ११ रन भन्दा बढी जोड्न सकेनन्। अन्य ब्याट्सम्यानले उल्लेख्य रन बटुल्न सकेनन्।
बलिङमा कोलकताका पाँच बलरले १-१ विकेट लिए। शिभम् मावी, वरुण चक्रवर्ती, कमलेश नगरकोटी, सुनील नारिन र आन्द्रे रसेलले १-१ विकेट लिएका हुन्।
आइपिएलमा बिहीबार सनराइजर्स हैदरावाद र किंग्स ११ पञ्जावबीच खेल हुनेछ।
