जय ट्रफी एलिट कप बहुदिवसीय प्रतियोगिताअन्तर्गत दोस्रो खेलमा नेपाल पुलिस क्लबले मधेस प्रदेशलाई पहिलो इनिङग्समा १२९ रनमै अलआउट गरेको छ।
वीरगञ्जमा टस जितेको पुलिसले फिल्डिङ रोजेपछि पहिले ब्याटिङ गरेको मधेस लञ्चपछि ब्याटिङ नचल्दा १२९ रनमा अलआउट भएको हो।
३ विकेट गुमाउँदा ९९ रन जोडेको मधेशले बाँकी ७ विकेट गुमाउँदा केवल ३० रन मात्र बनाउन सक्यो।
मधेशका लागि ओपनिङ ब्याटर मयन यादवले ५९ रन जोडे भने निरज यादवले २९ रनको योगदान गरे। मयनले बागमतीविरूद्धको अघिल्लो खेलमा शतक प्रहार गरेका थिए।
अभिषेक तिवारीले नटआउट १७ रन जोड्दा मधेशका अरु ब्याटरले दोहोरो अंकमा रन बनाउन सकेनन्।
बलिङमा पुलिसका गुल्सन झाले ५ विकेट लिए भने कुशल भुर्तेलले २ विकेट लिन सफल भए।
अघिल्लो खेलमा पुलिसले आर्मी र मधेशले बागमती प्रदेशसँग बराबरी खेलेका थिए।
