जापानको आइची-नागोयामा हुने सन् २०२६ को एसियाली खेलकुदका लागि अफगानिस्तानले आफ्नो क्रिकेट टोलीको घोषणा गरेको छ।
ब्याटर दर्विस रसुलीको कप्तानीमा घोषणा गरिएको १५ सदस्यीय टोलीमा ६ जना नयाँ खेलाडीहरूलाई मौका दिइएको छ भने ५ जना खेलाडीसँग १० भन्दा कम अन्तर्राष्ट्रिय खेलको अनुभव छ।
टोलीमा करिम जनत र नजिबुल्लाह जाद्रान जस्ता अनुभवी खेलाडीहरू रहेका छन्, जसले टोलीलाई सन्तुलन प्रदान गर्नेछन्। स्पिन बलिङको कमाण्ड नाङ्गेलिया खरोटेले सम्हाल्नेछन्।
टोलीमा अफगानिस्तानका दिग्गज खेलाडी मोहम्मद नाबीका छोरा हसन इसाखिल र गत फेब्रुअरीमा भारतविरुद्धको यू-१९ विश्वकपमा शतक प्रहार गरेका फैसल शिनोजादालाई पनि समेटिएको छ।
घरेलु लिग 'स्पागिजा क्रिकेट लिग'मा उत्कृष्ट प्रदर्शन गर्ने खेलाडीहरूलाई प्राथमिकता दिइएको छ।
एसियाली खेलकुदको समूह चरणमा नेपालको पुरुष क्रिकेट टोलीले अफगानिस्तान र आयोजक जापानसँग खेल्ने तय भएको छ। हालै भएको समूह 'ड्र' अनुसार समूहमा नेपाल, अफगानिस्तान र जापान छन्। अर्को समूहमा हङकङ, मलेसिया र ओमान छन्।
दुवै समूहका शीर्ष दुई-दुई टोलीहरू क्वार्टरफाइनलमा प्रवेश गर्नेछन्।
एसियाका चार प्रमुख टोलीहरू—भारत, पाकिस्तान, श्रीलंका र बंगलादेश—भने वरीयताका आधारमा सिधै क्वार्टरफाइनल (अन्तिम आठ) मा पुगिसकेका छन्। समूह चरणबाट छनोट भएर आउने चार टोलीले यी चार ठूला टोलीहरूसँग सेमिफाइनल प्रवेशका लागि प्रतिस्पर्धा गर्नेछन्।
क्रिकेटका खेलहरू आगामी सेप्टेम्बर २४ देखि अक्टोबर ३ सम्म जापानको आइचीमा आयोजना हुनेछन्।
अफगानिस्तानको १५ सदस्यीय टोली:
दर्विस रसुली (कप्तान), मोहम्मद इसाक (विकेटकिपर), मोहम्मद अक्रम, हसन इसाखिल, खालिद तानिवाल, इमरान मिर, फैसल शिनोजादा, नजिबुल्लाह जाद्रान, फरमानुल्लाह, इसमत आलम, करिम जनत, नाङ्गेलिया खरोटे, अरब गुल मोमान्द, फरिदुन दाउदजाई र अब्दुल्लाह अहमदजाई।
-1746009348.jpg)
