भारतविरुद्धको पहिलो टेस्टको अन्तिम दिन श्रीलंकाका विकेटकिपर ब्याटर निरोशन डिक्वेला र भारतीय फिल्डर यशस्वी जैसवालबीच मैदानमा रोचक संवाद भएको छ। जैसवालले उनलाई 'हुक सट' खेल्न उक्साएको केही बेरमै डिक्वेला १२ रन बनाएर आउट भएका थिए।
गालेमा ३७२ रनको लक्ष्य पछ्याइरहेको श्रीलंकाका लागि डिक्वेलाको विकेट निकै महत्वपूर्ण थियो। उनलाई प्रसिद्ध कृष्णाले आउट गरेका थिए, तर भारतीय टोलीका सदस्यहरू रविन्द्र जडेजा, मानव सुथार र ऋषभ पन्तले डिक्वेलालाई पगाल्न भूमिका खेलेको भन्दै जैसवाललाई बधाई दिएका थिए।
श्रीलंकाको इनिङ्सको ६०औं ओभरमा प्रसिद्ध कृष्णाले सर्ट बलहरू फ्याँकिरहेका थिए। त्यसै बेला स्क्वायर लेगमा फिल्डिङ गरिरहेका जैसवाल डिक्वेलाको नजिक आए र उनलाई सट प्रहार गर्न उक्साउन थालेको विषय क्रिक इन्फो लेखेको छ।
जैसवालले डिक्वेलालाई पहिलो इनिङ्समा निकै रक्षात्मक (८० रन बनाउन २ घण्टा ४० मिनेट लगाएको) खेलेको सम्झाउँदै भने, ‘पहिलो इनिङ्समा धेरै सटहरू देखिएनन्, मलाई केही सटहरू हेर्न मन छ।’
उनले रंगशालाको स्ट्यान्डतर्फ इशारा गर्दै थपे, ‘त्यहाँ बल प्रहार गर्नुस्, मलाई केही हेर्नु छ।’
जवाफमा डिक्वेलाले सुरुमा ‘हुन्छ’ भने पनि पछि जैसवाललाई जिस्क्याउँदै भने, ‘यदि तिमीले मलाई आइपिएलमा लैजान्छौ भने म त्यसो गर्छु।’
जैसवालले पनि तुरुन्तै जवाफ दिए, ‘म तिमीलाई १०० प्रतिशत लैजान्छु।’
डिक्वेलाले अर्को बलमा दुई रन जोडेपछि जैसवालले पुनः थपे, ‘यदि तिमीले त्यहाँ सट प्रहार गर्यौ भने म पक्कै पनि सांगालाई भन्नेछु।’ राजस्थान रोयल्सका प्रशिक्षक कुमार सांगाकारा र डिक्वेला एउटै स्कुलका विद्यार्थी हुन्।
यद्यपि, डिक्वेलाले 'हुक सट' खेल्ने प्रयास त गरेनन्, तर अर्को बलमा कट गर्ने प्रयास गर्दा ब्याटको किनारा लाग्दै विकेटकिपर ऋषभ पन्तको हातमा क्याच पुग्यो। भारतीय खेलाडीहरूले यसलाई जैसवालको मनोवैज्ञानिक जितका रूपमा उत्सव मनाए। अन्ततः श्रीलंका यो खेलमा १६५ रनले पराजित भयो।
मैदानमा सधैं बोलिरहने स्वभावका डिक्वेला यसअघि २०१७ को कोलकाता टेस्टमा पनि भारतीय खेलाडीहरूसँगको संवादका कारण चर्चामा थिए। त्यतिबेला उनले भारतीय टोलीको समय खेर फाल्न आफूले कुराकानी गरिरहेको बताएका थिए।
डिक्वेला गत वर्ष नेपाल आएका थिए। उनले नेपाल प्रिमियर लिग (एनपिएल) को दोस्रो सइजनमा लुम्बिनी लायन्सलाई उपाधि जिताउन महत्वपूर्ण भूमिका खेलेका थिए। उनी आगामी तेस्रो सिजनका लागि पनि लुम्बिनीमै अनुबन्धित भएका छन्।
