श्रीलंकाका अलराउन्डर सहन अराचचिगेले काठमान्डु गोर्खाजबाट नेपाल प्रिमियर लिग (एनपिएल) क्रिकेट खेल्ने भएका छन्।
एनपिएलको फ्रेन्चाइज टोली गोर्खाजले बुधबार आफ्नो समाजिक सञ्जालबाट सहनलाई अनुबन्धन गरेको जनाएको छ ।
३० वर्षे सहनले श्रीलंकाबाट ५ एकदिवसीय अन्तर्राष्ट्रिय र एक टी–२० अन्तर्राष्ट्रिय खेलिसकेका छन् । उनले २०२३ को जुलाईमा वेस्ट इन्डिजविरुद्ध हरारेमा भएको विश्वकप छनोटबाट एकदिवसीय अन्तर्राष्ट्रियमा ‘डेब्यु’ गरेका थिए । सहनले श्रीलंका ‘ए’ को पनि कप्तानी गर्दै आएका छन् ।
लंका प्रिमियर लिगमा हालै गल गालान्ट्सलाई उपाधि दिलाउन प्रमुख भूमिका खेलेका थिए । गल गालान्ट्सले पहिलो पटक लंक प्रिमियर लिग जित्दा सहनले सबै ११ खेल खेल्दै १४७ माथिको स्ट्राइक रेटमा २४० रन बनाएका थिए । सहनसँग विगतमा नेपालमा फ्रेन्चाइज क्रिकेट खेलेको अनुभव पनि छ । देव्रेहाते उनी माथिल्लोक्रममा ब्याटिङ गर्न सक्छन् भने अफ स्पिन बलिङ पनि गर्छन ।
‘विजय भाव बोकेका सहन एक जोशिला खेलाडी हुन्, उनी निरन्तर एक रुपको प्रदर्शन दिन सक्छन् र दबाबमा पनि योजना अनुसार खेल्दै लंका प्रिमियर लिग र श्रीलंका ‘ए’ बाट म्याचहरु जिताएका छन्। उनको स्वभाव र स्पष्ट मानसिक्ताले हाम्रो ब्याटिङ लाइनअपलाई मद्धत गर्नेमा म विश्वस्त छु । उनमा जुन ब्याटिङ, बलिङ र फिल्डिङ क्षमता छ, त्यो काठमान्डु गोर्खाजका लागि फाइदा हुनसक्छ ।’ शरद भेषावकर, क्रिकेट डाइरेक्टर, काठमान्डु गोर्खाज ।
