मलेसियामा जारी एसिसी प्रिमियर कपमा बहराइनमाथि ७ विकेटको जित निकालेर विजयी सुरुवात गरेपछि नेपालका कप्तान सन्दीप लामिछानले बाढी पीडितप्रति समर्पित गरेका छन्।
‘उत्कृष्ट टिमवर्क, अब अर्को खेलतिर,’ सन्दीपको भनाइ छ, ‘यो जित मेरो देश नेपालका सुन्दर जनताका लागि हो, जो अहिले कठिन समयबाट गुज्रिरहेका छन्। कृपया नेपाल र यहाँका जनतालाई प्रार्थनामा सम्झनुहोस्। हामी मैदानमा सबकुरा दिन जारी राख्नेछौं, हाम्रा जनताका अनुहारमा थोरै भए पनि खुसी, शक्ति र मुस्कान ल्याउने आशासहित। जय नेपाल!’
नेपालले सोमबार बहराइनलाई ७ विकेटले पराजित गर्दै नेपालले सानदार सुरुवात गरेको हो।
बहराइनले दिएको ८८ रनको सामान्य लक्ष्य नेपालले २१ ओभरमा ३ विकेट गुमाएर पूरा गर्यो।
त्यसअघि ओपनिङ ब्याटर तथा विकेटकिपर आसिफ शेख १८ रन बनाएर आउट भए। उनले २५ बलमा २ चौका र १ छक्का प्रहार गरे।
देव खनाल १९ बलमा १० रन जोडेर आउट भए भने इशान पाण्डे १ रनमा रनआउटको सिकार भए।
ओपनर अर्जुन कुमालले ५८ बलमा ५ चौकाको मद्दतमा नटआउट ३६ रन बनाए। रोहितकुमार पौडेलले १४ बलमा नटआउट १९ रन बनाए। उनले १ चौका र १ छक्का प्रहार गरे।
टस जितेको नेपालले फिल्डिङ रोजेपछि पहिले ब्याटिङ गरेको बहराइन ३६.२ ओभरमा ८७ रनमै अलआउट भयो।
बहराइनको ब्याटिङ ध्वस्त पार्न नेपालका कप्तान सन्दीप लामिछानेले पाँच विकेट लिए। उनले १० ओभरमा केवल १४ रन खर्चिए भने ४ ओभर त मेडन नै फ्याँके। सन्दीप खेलको प्लेयर अफ दि म्याच घोषित भए।
यस्तै ललितराजवंशी ३ विकेट लिए भने करण केसीको नाममा २ विकेट रह्यो।
बहराइनका लागि फैज अहमदले सबैभन्दा बढी १५ रन जोड्न सके।
प्रतितयोगितामा नेपालले दोस्रो खेल भदौ १८ गते मलेसिया, तेस्रो खेल भदौ २१ गते साउदी अरेबिया र अन्तिम खेल भदौ २३ मा हङकङसँग खेल्नेछ।
समूहमा शीर्ष दुईमा परे नेपाल सेमिफाइनल पुग्नेछ। सेमिफाइनल भदौ २५ गते, तेस्रो स्थान र फाइनल खेल भदौ २७ गते हुनेछ।
२०२७ को एसिया कपमा छनोट हुनका लागि नेपालले प्रतियोगिताको जित्नु पर्नेछ।
