इंग्ल्यान्डविरुद्धको टेस्ट सिरिजमा लगातार हार व्यहोरेपछि पाकिस्तानी क्रिकेट टोलीमा ठूलो फेरबदल गरिएको छ।
लर्ड्समा भएको दोस्रो टेस्टमा १९४ रनको लज्जास्पद हारसँगै पाकिस्तानले सिरिज गुमाइसकेको छ। पाकिस्तान क्रिकेट बोर्डले तेस्रो टेस्ट सुरु हुनुअघि नै मुख्य प्रशिक्षक सर्फराज अहमदलाई पदबाट हटाएको छ र टोलीका सात खेलाडीलाई घर फर्काउने निर्णय गरेको छ।
अहिले टोलीको मुख्य प्रशिक्षकको जिम्मेवारी न्युजिल्याण्डका माइक हेसनलाई दिइएको छ, जसले यसअघि पाकिस्तानकोएकदिवसीय र टी-२० टोली हेर्दै आएका थिए। त्यस्तै, बलिङ प्रशिक्षक उमर गुलको ठाउँमा अष्ट्रेलियाका एशले नोफ्केलाई ल्याइएको छ।
पाकिस्तानले आफ्नो टोलीमा व्यापक परिवर्तन गरेको छ। घर फर्काइएका सात खेलाडीमध्ये पाँच जना त यसअघिका दुई खेलमा खेलिसकेका खेलाडी हुन्। उनीहरूको सट्टामा सात नयाँ खेलाडीलाई इङ्गल्याण्ड बोलाइएको छ, जसमा पाँच जना त अन्तर्राष्ट्रिय टेस्ट खेलको अनुभव नै नभएका नयाँ अनुहार छन्। नयाँ आउनेहरूमध्ये साइम अयुब र अब्दुल्लाह फजलसँग मात्र टेस्ट खेलेको अनुभव छ।
टोलीबाट हटाइएका चर्चित खेलाडीमा सलमान अली आगा छन्, जसले पहिलो टेस्टमा बाबर आजम घाइते हुँदा कप्तानी गरेका थिए। त्यस्तै ओपनिङ ब्याट्सम्यान इमाम-उल-हकलाई पनि खराब प्रदर्शन र खुट्टाको चोटको कारण देखाई घर पठाइएको छ।
लामो समयदेखि टोलीमा रहेका विकेटकिपर मोहम्मद रिजवान पनि खराब फर्मका कारण टोलीबाट बाहिरिएका छन्। स्पिनर अली उस्मान, तीव्र गतिका बलर खुर्रम शहजाद, आमिर जमाल र मोहम्मद ओवैस जाफरलाई पनि पाकिस्तान फिर्ता पठाइएको छ।
यो भ्रमण पाकिस्तानका लागि निकै खराब सावित भएको छ। अहिलेसम्मका चार इनिङ्समा पाकिस्तानले एक पटक पनि २०० रनको आँकडा पार गर्न सकेको छैन। खेलाडीहरूको फिल्डिङ पनि निकै कमजोर देखिएको छ। ३६ वर्षीय बलर मोहम्मद अब्बासले एक्लैले संघर्ष गरे पनि अरू खेलाडीबाट साथ पाउन सकेका छैनन्।
मैदान बाहिर पनि पाकिस्तान विवादमा मुछिएको छ। दोस्रो टेस्टका क्रममा पूर्व प्रधानमन्त्री इमरान खानका छोराहरूको अन्तर्वार्ता प्रसारण गरेको भन्दै बोर्डले 'स्काई स्पोर्ट्स' सँग गुनासो गरेको थियो। तर, उल्टै यो कदमले गर्दा इमरान खानको स्वास्थ्य र जेल जीवनबारे अझ बढी चर्चा हुन पुग्यो।
