अफगानिस्तानविरुद्ध दिल्लीमा हुने तीन खेलको टी-२० सिरिजका लागि भारतीय टोलीको घोषणा गरिएको छ। \
यस टोलीमा जसप्रित बुमराह, नितिश कुमार रेड्डी, हर्षित राणा र वासिङ्टन सुन्दरलाई समावेश गरिएको छ। तर, उनीहरूले खेल्नका लागि बीसीसीआईको 'सेन्टर अफ एक्सीलेन्स' बाट फिटनेस क्लियरेन्स (शारीरिक रूपमा फिट भएको अनुमति) पाउनु पर्नेछ।
गएको जुलाईमा जिम्बावे भ्रमणका बेला आराम दिइएका सन्जु सामसन, अर्शदीप सिंह र अक्षर पटेल टोलीमा फर्किएका छन्। तर, स्टार अलराउन्डर हार्दिक पाण्ड्या भने चोटबाट निको भई नसकेका कारण १५ सदस्यीय टोलीमा अटाएनन्।
यस्तै चोटका कारण जिम्बावे भ्रमण गुमाएका स्पिनर वरुण चक्रवर्तीको पनि टोलीमा पुनरागमन भएको छ। अर्कोतर्फ जिम्बावे भ्रमणमा रहेका रिंकु सिंह, प्रभसिमरन सिंह, मयंक यादव, यश ठाकुरसहित ८ खेलाडीलाई यसपटक टोलीमा राखिएको छैन।
जसप्रित बुमराह लामो समयदेखि घुँडाको समस्यासँग जुधिरहेका छन्। हर्षित राणा र वासिङ्टन सुन्दर ह्यामिस्ट्रिङको चोटबाट गुज्रिरहेका छन् भने नितिश कुमार रेड्डीलाई तिघ्राको मांसपेशी मा समस्या देखिएको थियो।
भारत र अफगानिस्तानबीचको यो टी-२० सिरिज सेप्टेम्बर १३, १५ र १७ तारिखमा दिल्लीमा हुनेछ। खेलहरू दिल्लीमा भए पनि यस सिरिजको आधिकारिक आयोजक भने अफगानिस्तान नै रहनेछ।
अफगानिस्तानविरुद्ध खेल्ने भारतीय टोली
श्रेयस अय्यर (कप्तान), अभिषेक शर्मा, वैभव सूर्यवंशी, सन्जु सामसन, इशान किशन, तिलक वर्मा, शिवम दुबे, नितिश कुमार रेड्डी*, अक्षर पटेल, वासिङ्टन सुन्दर*, वरुण चक्रवर्ती, रवि बिश्नोई, जसप्रित बुमराह*, अर्शदीप सिंह, हर्षित राणा*।
