आगामी एसियन गेम्सका लागि जापान पुग्ने क्रिकेट टोलीहरूले आफ्नो इच्छाअनुसार होटलको व्यवस्था आफैँ गर्न सक्ने भएका छन्।
आयोजकले उपलब्ध गराएको आवासका विकल्पहरूलाई लिएर चासो र चिन्ता व्यक्त भएपछि जापान क्रिकेट संघका सीईओ नाओकी एलेक्स मियाजीले बुधबार यस्तो जानकारी दिएका हुन्।
मियाजीका अनुसार आयोजक समिति र एशियन क्रिकेट काउन्सिलबीच लामो समयदेखि बसोबासको विषयमा छलफल भइरहेको छ।
उनले भने, ‘हामीले क्रिकेट टोलीहरूलाई होटलकै सुविधा दिएका छौँ, जबकि अन्य कतिपय खेलका खेलाडीहरूलाई क्रुज जहाज वा कन्टेनर होटल जस्ता सीमित सुविधाहरूमा राखिँदैछ। यदि कुनै टोलीले आफ्नै होटल व्यवस्था गर्न चाहन्छ भने उनीहरू स्वतन्त्र छन्।’
निसिनस्थित 'कोरोगी स्पोर्ट्स पार्क' मा महिला र पुरुष दुवैका क्रिकेट खेलहरू हुनेछन्। यो मैदान तयार पार्न आयोजकसँग मात्र १७ महिनाको समय थियो। ‘आइची प्रान्तमा पहिले कुनै स्तरीय क्रिकेट मैदान थिएन, त्यसैले हामीले शून्यबाट काम सुरु गर्नुपर्यो,’ मियाजीले बताए।
यस मैदानमा 'टर्फ' र 'हाइब्रिड' पिचहरू बनाइएको छ, जसका लागि श्रीलंका क्रिकेटले आफ्ना उत्कृष्ट क्युरेटरहरू पठाएर सहयोग गरेको छ। मियाजीको दाबी अनुसार एसियन गेम्सको इतिहासमै यो अहिलेसम्मकै उत्कृष्ट क्रिकेट मैदान र पिच हुनेछ।
एसियन गेम्समा महिला क्रिकेट सेप्टेम्बर १७ देखि २२ सम्म तथा पुरुष क्रिकेट सेप्टेम्बर २४ देखि अक्टोबर ३ सम्म हुनेछ।
पुरुष क्रिकेटमा नेपाल, मलेसिया, हङकङ र ओमानले छनोट चरण पार गर्दै आफ्नो स्थान सुरक्षित गरेका छन्। यस्तै अफगानिस्तान, बंगलादेश, भारत, पाकिस्तान र श्रीलंकाले वरियताका आधारमा सिधै खेल्न पाउनेछन् भने जापान आयोजक राष्ट्रको नाताले सहभागी हुनेछ।
नेपालले समूह चरणमा अफगानिस्तान र आयोजक जापानसँग खेल्नेछ। शीर्ष दुईमा परे क्वार्टरफाइनलमा प्रतिस्पर्धा गर्न पाउनेछ।
