बार्सिलोनालाई एट्लेटिको मड्रिडका स्ट्राइकर जुलियन अल्भारेजसँग सम्पर्क गरेको विषयमा ६०२ युरो जरिवाना गरिएको छ।
एट्लेटिको मड्रिडले स्पेनिस लिग प्रतिद्वन्द्वी बार्सिलोनाविरुद्ध उजुरी दिएको थियो। बार्सिलोनाले आफूलाई लिखित रूपमा जानकारी नदिई अर्जेन्टिनाका अन्तर्राष्ट्रिय खेलाडी अल्भारेजसँग सम्पर्क गरेको एट्लेटिकोको आरोप थियो।
२६ वर्षीय अल्भारेज एट्लेटिकोमै छन्। उनी सन् २०३० को जुनसम्मका लागि क्लबको सम्झौतामा आबद्ध छन्।
स्पेनिस फुटबल संघले बार्सिलोनालाई जरिवाना गरेको हो। एट्लेटिकोले यस विषयमा विश्व फुटबलको सर्वोच्च निकाय फिफामा पनि उजुरी दिएको थियो। तर, फिफाले यस विषयमा आफ्नो क्षेत्राधिकार नपर्ने जनाएको थियो।
यस सिजन अल्भारेजले आफ्नै समर्थकबाट पटक–पटक हुटिङको सामना गर्नुपरेको छ। यद्यपि, गत शनिबार डेपोर्टिभो ला कोरुनाविरुद्ध निर्णायक गोल गरेपछि केही समर्थकले उनलाई उभिएर ताली बजाउँदै सम्मान गरेका थिए।
त्यस जितसँगै प्रशिक्षक डिएगो सिमोनेको टोली लिगको शीर्ष स्थानमा रहेको बार्सिलोनाभन्दा दुई अंकले मात्र पछाडि छ।
खेलपछि अल्भारेजले एट्लेटिकोका समर्थकसँग माफी माग्ने अवसर पनि पाए। यसअघि गर्मीयाममा दिएको एक अन्तर्वार्तामा उनले बार्सिलोनाबाट खेल्ने आफ्नो सपना पूरा गर्न चाहेको बताएका थिए।
त्यही अभिव्यक्तिबारे बोल्दै अल्भारेजले भने, ‘त्यो मेरो गल्ती थियो। समर्थकहरू किन रिसाएका छन् भन्ने कुरा म बुझ्छु।’
उनले थपे, ‘यदि म समर्थक भएको भए म पनि रिसाउने थिएँ। विशेषगरी, म क्लबमा आएदेखि उनीहरूले मलाई दिएको साथलाई हेर्दा।’
अल्भारेज सन् २०२४ को अगस्टमा म्यानचेस्टर सिटीबाट एट्लेटिको मड्रिड आएका थिए। उनी ६ वर्षको सम्झौतामा आबद्ध भएका थिए। उनको सरुवा रकम बोनससहित ८ करोड १५ लाख पाउन्डसम्म पुगेको थियो।
म्यानचेस्टर सिटीका लागि १०३ खेलमा ३६ गोल गरेका अल्भारेजले एट्लेटिकोका लागि भने ११५ खेलमा ५१ गोल गरिसकेका छन्।
