थारिन्दु रत्नायकेको अविजित अर्धशतकप्रेरित सुदूरपश्चिम रोयल्स नेपाल प्रिमियर लिग (एनपिएल) को फाइनलमा प्रवेश गरेको छ।
दोस्रो क्वालिफायरमा बिहीबार चितवन राइनोजलाई ३ विकेटले पराजित गर्दै सुदूरपश्चिम लगातार तेस्रो पटक फाइनलमा पुगेको हो।
कीर्तिपुरस्थित त्रिवि अन्तर्राष्ट्रिय क्रिकेट मैदानमा चितवनले दिएको १३४ रनको लक्ष्य सुदूरपश्चिमले १९.५ ओभरमा ७ विकेट गुमाएर पूरा गर्यो।
सुदूरपश्चिमको जितमा रत्नायकेले अविजित ५३ रन बनाए। उनले ४२ बलमा ७ चौका प्रहार गरे। ५८ रनमा ४ विकेट गुमाएर दबाबमा परेको सुदूरपश्चिमलाई उनले आरिफ शेखसँग मिलेर खेलमा फर्काएका थिए।
रत्नायकेले छैटौं विकेटका लागि आरिफसँग २६ रनको साझेदारी गरे। आरिफले १० बलमा १० रन बनाएर १६औँ ओभरमा आउट भए। त्यसपछि उनले फाबियन एलेनसँग सातौं विकेटका लागि ३० रनको साझेदारी गरे। एलेनले १० बलमा ५ रन बनाए।
अन्तिम ओभरमा सुदूरपश्चिमलाई जितका लागि ४ रन आवश्यक थियो। चितवनका कमिल मिरशाले पहिलो चार बलमा २ रन मात्र दिए। चौथो बलमा एलेन रनआउट भएपछि खेल थप रोमाञ्चक बनेको थियो। त्यसबेला सुदूरपश्चिमलाई जितका लागि २ रन चाहिएको थियो। तर रत्नायकेले पाँचौं बलमा चौका प्रहार गर्दै टोलीलाई फाइनल पुर्याए।
सुदूरपश्चिमका लागि विनोद भण्डारीले १३ बलमा २३ रन बनाए। कप्तान दीपेन्द्रसिंह ऐरीले १६ बलमा १५, इशान पाण्डेले ९ बलमा १० र आरिफले १० रन जोडे। जर्ज मुन्से ८, स्कट कुगेलेइन २ र फाबियन एलेन ५ रनमा आउट भए। दीपक बोहरा शून्यमा अविजित रहे।
सुरुवाती पावरप्लेमा सुदूरपश्चिमले ४१ रन जोड्दा २ विकेट गुमाएको थियो। मुन्से ८ र भण्डारी २३ रन बनाएर आउट भए। त्यसपछि टोलीले ४५ रन पुग्दा थप दुई विकेट गुमायो। कुगेलेइन २ र पाण्डे १० रनमा आउट हुँदा सुदूरपश्चिम दबाबमा परेको थियो।
रत्नायकेले कप्तान दीपेन्द्रसँग पाँचौं विकेटका लागि ३१ रनको साझेदारी गरे। दीपेन्द्र १६ बलमा १५ रन बनाएर आउट भएपछि आरिफसँगको साझेदारीले टोलीलाई लक्ष्यतर्फ अघि बढायो।
चितवनका लागि रन्जित कुमारले २ तथा उस्मा मीर, सलाउद्दीन खान, रिजन ढकाल, कमलसिंह ऐरी र कमिल मिरशाले समान १ विकेट लिए।
यसअघि टस जितेर पहिले ब्याटिङ गरेको चितवनले निर्धारित २० ओभरमा ९ विकेट गुमाएर १३३ रन बनाएको थियो।
चितवनका लागि डेभिड मलानले सर्वाधिक ७१ रनको योगदान दिए। उनले ५१ बलमा ९ चौका र २ छक्का प्रहार गरे। मलानले ३८ बलमा अर्धशतक पूरा गरेका थिए। सलाउद्दीन खानले १६ बलमा १८ तथा कमलसिंह ऐरीले ८ बलमा १० रन बनाए।
चितवनको सुरुवात निकै खराब रह्यो। टोलीले १५ रन जोड्दा नै कमिल मिरशा (४) र देव खनाल (६) लाई गुमाएको थियो। कप्तान रवि बोपारा पनि ८ बलमा १ रन बनाएर आउट भएपछि चितवन ३१/३ को अवस्थामा पुग्यो।
त्यसपछि मलानले विवेककुमार यादवसँग चौथो विकेटका लागि २७ रनको साझेदारी गरे। विवेक ११ बलमा ३ रन बनाएर आउट भए। कुशल मल्लले ५ बलमा १ रन मात्र बनाउन सके। उस्मा मीर पनि २ रनमा आउट भएपछि चितवन ६२ रनमा ६ विकेट गुमाएर संकटमा परेको थियो।
त्यसपछि मलानले सलाउद्दीनसँग सातौं विकेटका लागि ४० रनको महत्वपूर्ण साझेदारी गरे। सलाउद्दीन १८ रन बनाएर आउट भए। मलानले कमलसिंह ऐरीसँग आठौं विकेटका लागि १४ र रिजन ढकालसँग नवौं विकेटका लागि १७ रनको साझेदारी गरे। मलान अन्तिमसम्म अविजित रहे।
सुदूरपश्चिमका स्कट कुगेलेइनले ३ विकेट लिए। उनले ४ ओभरमा २७ रन खर्चिए। रत्नायकेले ४ ओभरमा २३ रन दिएर २ विकेट लिए। कप्तान दीपेन्द्र, हेमन्त धामी र इशान पाण्डेले समान १ विकेट हात पारे।
बलिङमा २३ रन दिएर २ विकेट लिएका र ब्याटिङमा अविजित ५३ रन बनाएका रत्नायके प्लेयर अफ द म्याच घोषित भए।
तेस्रो पटक फाइनलमा सुदूरपश्चिम
सुदूरपश्चिम लगातार तेस्रो पटक एनपिएलको फाइनलमा पुगेको हो। यसअघिका दुवै संस्करणमा फाइनल पुगे पनि टोली उपाधि जित्न असफल भएको थियो। पहिलो संस्करणमा जनकपुर बोल्ट्स र दोस्रो संस्करणमा लुम्बिनी लायन्ससँग सुदूरपश्चिम पराजित भएको थियो।
यसपटक पनि सुदूरपश्चिमले उपाधिका लागि लुम्बिनी लायन्ससँगै प्रतिस्पर्धा गर्नेछ। यससँगै दोस्रो संस्करणको फाइनलको पुनरावृत्ति हुने भएको छ।
गत संस्करणको फाइनलमा लुम्बिनीले सुदूरपश्चिमलाई पराजित गर्दै उपाधि जितेको थियो। यस सिजन लिग चरणको पहिलो भेट र पहिलो क्वालिफायरमा पनि लुम्बिनीले सुदूरपश्चिमलाई हराएको थियो।
अब लुम्बिनीसँग सुदूरपश्चिमविरुद्ध लगातार चौथो जित निकाल्दै उपाधि रक्षा गर्ने अवसर हुनेछ। यता सुदूरपश्चिमसँग भने अघिल्ला तीन हारको बदला लिँदै पहिलो पटक एनपिएल उपाधि जित्ने अवसर छ। फाइनल खेल शनिबार हुनेछ।