थारिन्दु रत्नायकेको अविजित अर्धशतकप्रेरित सुदूरपश्चिम रोयल्स नेपाल प्रिमियर लिग (एनपिएल) को फाइनलमा प्रवेश गरेको छ। दोस्रो क्वालिफायरमा बिहीबार चितवन राइनोजलाई ३ विकेटले पराजित गर्दै सुदूरपश्चिम लगातार तेस्रो पटक फाइनलमा पुगेको हो।
कीर्तिपुरस्थित त्रिवि अन्तर्राष्ट्रिय क्रिकेट मैदानमा चितवनले दिएको १३४ रनको लक्ष्य सुदूरपश्चिमले १९.५ ओभरमा ७ विकेट गुमाएर पूरा गर्यो।
एनपिएलको तेस्रो संस्करणको फाइनल गत संस्करणकै पुनरावृत्ति हुने भएको छ। उपाधिका लागि शनिबार सुदूरपश्चिम रोयल्स र साविक विजेता लुम्बिनी लायन्स भिड्नेछन्। दुवै टोलीबीच लगातार दोस्रो सिजन फाइनलमा भेट हुन लागेको हो।
सुदूरपश्चिमका लागि यो लगातार तेस्रो फाइनल यात्रा हो। तर अघिल्ला दुई संस्करणमा फाइनल पुगेर पनि टोली उपाधि जित्न असफल भएको थियो। पहिलो संस्करणमा जनकपुर बोल्ट्स र दोस्रो संस्करणमा लुम्बिनी लायन्ससँग सुदूरपश्चिम पराजित भएको थियो।
रोचक पक्ष के छ भने सुदूरपश्चिमले अघिल्ला दुवै संस्करणमा पहिलो क्वालिफायर जित्दै सिधै फाइनलमा स्थान बनाएको थियो। तर निर्णायक खेलमा उपाधि जित्न सकेन। यसपटक भने पहिलो क्वालिफायरमा लुम्बिनीसँग पराजित भएपछि दोस्रो क्वालिफायरको बाटो हुँदै फाइनल पुग्नुपरेको छ।
गत संस्करणको फाइनलमा लुम्बिनीले सुदूरपश्चिमलाई ६ विकेटले पराजित गर्दै पहिलो पटक एनपिएल उपाधि जितेको थियो। टस जितेर पहिले ब्याटिङ गरेको सुदूरपश्चिम १९.१ ओभरमा ८५ रनमै समेटिएको थियो। जवाफमा लुम्बिनीले ९ ओभरमा ४ विकेट गुमाएर ८६ रनको लक्ष्य पूरा गरेको थियो।
लुम्बिनीले गत संस्करणको उपाधि यात्रामा लगातार ६ खेल जितेको थियो। सुरुवाती चरणमा तीन हार बेहोरेर पनि उत्कृष्ट पुनरागमन गरेको टोलीले एलिमिनेटर, दोस्रो क्वालिफायर र फाइनल जित्दै उपाधि उचालेको थियो। यसपटक पनि लुम्बिनीले आफ्नो बलियो लयलाई निरन्तरता दिएको छ। जारी संस्करणमा अहिलेसम्म एउटा मात्र खेल हारेको लुम्बिनी लगातार दोस्रो उपाधि जित्ने लक्ष्यमा छ।
यस सिजन लिग चरणको पहिलो भेट र पहिलो क्वालिफायर दुवैमा लुम्बिनीले सुदूरपश्चिमलाई पराजित गरेको थियो। त्यसैले फाइनलमा लुम्बिनीसँग लगातार चौथो जित निकाल्दै उपाधि रक्षा गर्ने अवसर हुनेछ। यता सुदूरपश्चिमसँग भने यस सिजनका दुवै हारसहित अघिल्लो फाइनलको बदला लिँदै पहिलो पटक एनपीएल उपाधि जित्ने अवसर छ।
अघिल्ला दुई फाइनलमा उपविजेतामा सीमित भएको सुदूरपश्चिम यसपटक इतिहास बदल्ने दाउमा छ। लगातार दुई सिजनको उपाधि जित्ने लक्ष्यमा रहेको लुम्बिनीलाई भने सुदूरपश्चिमको चुनौती पार गर्नुपर्नेछ। शनिबारको फाइनलले एनपिएलको नयाँ च्याम्पियन होइन, साविक विजेताको उपाधि रक्षा हुन्छ कि सुदूरपश्चिमले पहिलो पटक ट्रफी उचाल्छ भन्ने टुंगो लगाउनेछ।