चितवनमा पहिलो पटक अन्तर्राष्ट्रिय खुला तेक्वान्दो च्याम्पियनसिप आयोजना हुने भएको छ। चितवन तेक्वान्दो डोजाङको आयोजनामा कात्तिक १३ देखि १५ गतेसम्म (अक्टोबर ३० देखि नोभेम्बर १) ‘प्रथम सौराहा अन्तर्राष्ट्रिय खुला तेक्वान्दो च्याम्पियनसिप २०२६’ सञ्चालन हुन लागेको हो।
आयोजकका अनुसार प्रतियोगितामा नेपालका सातवटै प्रदेशसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, साउदी अरेबिया र जापानलगायत देशका खेलाडी तथा टोली सहभागी हुने अपेक्षा गरिएको छ। प्रतियोगितामा करिब ८०० खेलाडीको सहभागिता रहने अनुमान गरिएको आयोजकले जनाएको छ।
चितवनमा तेक्वान्दो खेलको विकास गर्ने, राष्ट्रिय तथा अन्तर्राष्ट्रिय खेलाडीलाई प्रतिस्पर्धाको साझा मञ्च उपलब्ध गराउने र नेपाली तेक्वान्दोको स्तर उकास्ने उद्देश्यले प्रतियोगिता आयोजना गर्न लागिएको चितवन तेक्वान्दो डोजाङका रोशन खानले बताए।
प्रतियोगितामा तेक्वान्दोका पुम्से र ग्योरोगी विधाअन्तर्गत विभिन्न उमेर तथा तौल समूहमा प्रतिस्पर्धा हुनेछ। राष्ट्रिय तथा अन्तर्राष्ट्रिय खेलाडीबीच प्रतिस्पर्धा गराउँदै उनीहरूको क्षमता अभिवृद्धि गर्ने, अनुभव आदानप्रदान गर्ने र खेलकुदमार्फत अन्तर्राष्ट्रिय मित्रता विस्तार गर्ने लक्ष्य आयोजकको छ।
प्रतियोगितामा टिमतर्फ प्रथम हुने टोलीले ५० हजार रुपैयाँ, दोस्रो हुनेले ३० हजार र तेस्रो हुने टोलीले २० हजार रुपैयाँ पुरस्कार प्राप्त गर्नेछन्।
त्यस्तै, उत्कृष्ट पुम्से पुरुष, उत्कृष्ट पुम्से महिला, उत्कृष्ट ग्योरोगी पुरुष, उत्कृष्ट ग्योरोगी महिला, उत्कृष्ट प्रशिक्षक र उत्कृष्ट रेफ्रीलाई जनही १०० अमेरिकी डलर पुरस्कार प्रदान गरिने प्रतियोगिताका अन्तर्राष्ट्रिय संयोजक अशोक खड्काको भनाइ छ।
-1793174382.jpg)
प्रतियोगिता सञ्चालनका लागि नेपाल तेक्वान्दो संघ, बागमती प्रदेश तेक्वान्दो संघ र चितवन जिल्ला तेक्वान्दो संघको सहयोग तथा समन्वय रहने आयोजकले जनाएको छ।
आयोजकले प्रतियोगितालाई खेलकुदमा मात्र सीमित नराखी सौराहाको पर्यटन प्रवर्द्धनसँग पनि जोडेको छ। अन्तर्राष्ट्रिय खेलाडी, प्रशिक्षक तथा पदाधिकारीको आगमनले चितवनको पर्यटन र स्थानीय आर्थिक गतिविधिमा सकारात्मक योगदान पुग्ने अपेक्षा गरिएको छ।
प्रतियोगितामार्फत सौराहालाई खेलकुद पर्यटनको गन्तव्यका रूपमा स्थापित गर्ने र चितवनको पहिचान अन्तर्राष्ट्रियस्तरमा विस्तार गर्ने लक्ष्य राखिएको आयोजकको भनाइ छ।
चितवन तेक्वान्दो डोजाङका वरिष्ठ मास्टर रोशन खान, प्रतियोगिता संयोजक प्रज्वल दवाडी र अन्तर्राष्ट्रिय संयोजक अशोक खड्काले प्रतियोगितालाई सफल बनाउन खेलाडी, प्रशिक्षक, रेफ्री, संघसंस्था, प्रायोजक, सञ्चारमाध्यम तथा खेलप्रेमीको सहयोग अपेक्षा गरेका छन्।
