अभिनेता अनुपविक्रम शाहीले फिल्म 'टनेल २६'लाई नेपाली फिल्म उद्योगकै पहिलो जम्बी फिल्म भएको दाबी गरेका छन्।
फिल्मबारे कुरा गर्दै अनुपले 'टनेल २६'मा नेपाली फिल्ममा यसअघि खासै नदेखिएको विषयवस्तु प्रस्तुत गरिएको बताए। उनका अनुसार फिल्ममा हरर, मिस्ट्री, सस्पेन्स र थ्रिलरको मिश्रण छ।
'हामीले यसमा बिल्कुलै फरक कथा लिएका छौं। यो जम्बी विधामा बनेको फिल्म हो। नेपाली फिल्म उद्योगको इतिहास हेर्दा पहिलोपटक हामीले जम्बी फिल्म बनाउने प्रयास गरेका छौं,' उनले भने, 'विशेषगरी हरर, मिस्ट्री, सस्पेन्स र थ्रिलर मन पराउने दर्शकलाई यो फिल्म अवश्य मन पर्छ जस्तो लाग्छ।'
जम्बी भनेको सामान्यतया मरेपछि फेरि जीवित भएका मानिस वा मानिसलाई आक्रमण गर्ने पात्रलाई बुझिन्छ, जसलाई केन्द्रमा राखेर बनाइने फिल्मलाई जम्बी फिल्म भनेर बुझ्ने गरिन्छ।
'टनेल २६' भारत, भुटान र नेपालको सहकार्यमा निर्माण भएको हो। फिल्म असोज २३ गते अर्थात् अक्टोबर ९ मा प्रदर्शनमा आउँदैछ।
अनुपका अनुसार नेपालमा फिल्म नेपाली भाषामा र भुटानमा भुटानी भाषामा प्रदर्शन हुनेछ। भारतमा भने त्यहाँको भाषाअनुसार डब गरेर रिलिज गरिनेछ।
'यो भारत, भुटान र नेपालको सहकार्यमा बनेको फिल्म हो। नेपालमा रिलिज हुँदा निश्चित रूपमा नेपाली भाषामै रिलिज हुन्छ भने भुटानमा भुटानी भाषामा हुन्छ,' उनले भने, 'त्यसैले नेपालमा रिलिज हुने हिसाबले यो हाम्रो आफ्नै नेपाली फिल्म हो।'
भाषाअनुसार डब हुँदैमा फिल्मको पहिचान परिवर्तन नहुने उनको तर्क छ।
'हामीले धेरै भारतीय फिल्म पनि नेपालीमा डब गरेर हेर्ने गरेका छौं। तर भाषा परिवर्तन हुँदैमा त्यो भारतीय फिल्म हुन छोड्दैन,' उनले भने।
वास्तविक टनेलभित्र फिल्मको छायांकन गर्दा निकै कठिन अनुभव भएको अनुपले बताए। तर अहिले फिल्मको टिजरले पाइरहेको प्रतिक्रिया र दर्शकको उत्साहले छायांकनका क्रममा भोगेको दुःख बिर्साएको उनको भनाइ छ।
'टनेल २६'को टिजरले राम्रो प्रतिक्रिया पाइरहेको छ।
टिजरपछि फिल्मप्रति दर्शकको कौतुहलता पनि बढेको महसुस गरेको अनुपले बताए।
.JPG)
