स्वर्गीय अभिनेता सुनील थापाका छोरा अनमोल थापा बुवाको अन्तिम फिल्म 'हिमालयन गोल्ड' हेर्दा भावुक बनेका छन्।
बुधबार काठमाडौंको ठमेलस्थित छायाँ सेन्टरमा आयोजित फिल्मको प्रिमियरमा सहभागी अनमोलले ठूलो पर्दामा अन्तिम पटक बुवालाई देख्न पाउनु आफ्ना लागि भावुक र विशेष अनुभव भएको बताए।
बुवाको आवाज सुन्दा र पर्दामा उनको अभिनय हेर्दा पुराना सम्झनाहरू ताजा भएर आएको अनमोलले सुनाए। यद्यपि, ठूलो पर्दामा अन्तिम पटक बुवालाई देख्न पाउनु आफ्ना लागि विशेष अवसर पनि भएको उनको भनाइ थियो।
'मेरो लागि यो एकदमै भावुक क्षण हो। उहाँको आवाज सुन्दा र बोल्ने शैली देख्दा धेरै पुराना कुराहरू फ्ल्यासब्याकजस्तै आउँछन्। तर ठूलो पर्दामा उहाँलाई अन्तिम पटक देख्न पाउनु राम्रो कुरा पनि हो। त्यसैले म यो फिल्मका लागि निकै उत्साहित थिएँ,' उनले भने।
अनमोलले 'हिमालयन गोल्ड'लाई नेपाली फिल्मको परम्परागत शैलीभन्दा फरक रहेको बताए। फिल्मको प्रस्तुतिलाई हलिउड शैलीसँग तुलना गर्दै उनले नेपालमा रहेको विशेष विषयलाई विश्वभर चिनाउने प्रयासका रूपमा पनि व्याख्या गरे।
'मलाई फिल्म एकदमै मन पर्यो। यो सामान्य नेपाली फिल्मजस्तो छैन। हलिउड फिल्मको शैलीमा बनेको महसुस हुन्छ। सबभन्दा ठूलो कुरा, यसले नेपालमा रहेको एउटा विशेष विषयलाई विश्वव्यापी रूपमा चिनाउने प्रयास गरेको छ,' उनले भने।
अनमोलसँगै प्रिमियरमा सहभागी नेपाली फिल्म क्षेत्रका अन्य कलाकार तथा सेलिब्रेटीले पनि फिल्मको खुलेर प्रशंसा गरेका छन्। वरिष्ठ कलाकार मदनकृष्ण श्रेष्ठले फिल्मको कथावस्तु, अभिनय र हिमाली दृश्यको प्रशंसा गर्दै यसलाई अन्तर्राष्ट्रिय स्तरको फिल्म बताए। यद्यपि, फिल्ममा प्रयोग भएको भाषा केही कडा लागेको उनको प्रतिक्रिया थियो।
निर्देशक दीपेन्द्र के.खनालले फिल्मलाई आर्ट हाउस र कमर्सियल दुवै पक्षको सन्तुलित प्रस्तुति भएको बताए। कथा, सिनेम्याटोग्राफी, साउन्ड र कलाकारको अभिनय उत्कृष्ट रहेको उल्लेख गर्दै उनले नयाँ निर्देशकलाई दर्शकले साथ दिनुपर्ने धारणा राखे।
अभिनेत्री लक्ष्मी वर्देवाले नेपाली परिवेशकै फरक विषयलाई उत्कृष्ट ढंगले पर्दामा उतारिएको बताइन्। अभिनेता नाजिर हुसेनले फिल्मले नेपाली सिनेमामा दर्शकले खोजिरहेको अतिरिक्त स्वाद दिने प्रतिक्रिया दिए। विशेषगरी फिल्मको लोकेसन र अन्त्यमा प्रस्तुत गरिएको महिलाको दृष्टिकोणबाट आफू प्रभावित भएको उनले बताए।
अभिनेत्री कविता नेपालीले कठिन हिमाली भूगोलमा पुगेर गरिएको छायांकन र निर्माण टिमको मेहनतको प्रशंसा गर्दै फिल्मले न्याय पाउनुपर्ने बताइन्। प्रिमियरमा सहभागी कलाकारहरूले फिल्मका अर्का मुख्य कलाकार स्वर्गीय सुनिल थापालाई पनि स्मरण गरेका थिए।
सन् १९९० को परिवेशमा आधारित 'हिमालयन गोल्ड'ले सुरक्षा अभावका कारण यार्सागुम्बा टिप्न जाने व्यक्तिमाथि हुने लुटपाट र त्यससँग जोडिएका घटनालाई प्रस्तुत गरेको छ। समुद्री सतहबाट करिब ४ हजार ८०० फिटमाथि छायांकन गरिएको फिल्ममा रूकुम, डोल्पा, रोल्पा र मनाङका समुदायको यार्सागुम्बासँग जोडिएको जीवन र निर्भरतालाई पनि देखाइएको छ।
ह्वाइट एलिफेन्ट मोसन पिक्चर प्रोडक्सनको ब्यानरमा बनेको फिल्ममा कर्मा शाक्य, परीक्षा लिम्बु, सुनिल थापा, मेनुका प्रधान, राहुल एन. मुखिया, अंकित खड्का, सुनिल तामाङ, तेन्जिङ ठकुरी, सेबिता अधिकारी र ऋषिकेश बस्याललगायतको अभिनय छ।
धीराज राजवंशीको कथा तथा निर्देशन रहेको फिल्मको पटकथा दीपेन्द गौचन र धीराज राजवंशीले तयार पारेका हुन्। मीनबहादुर भाम निर्माता रहेको फिल्ममा सुयश ज्ञवाली सह-निर्माता र राजु राजवंशी कार्यकारी निर्माता छन्।
फिल्मलाई भारतको प्रतिष्ठित वितरण कम्पनी एए फिल्म्सले वितरण गर्नेछ। यसअघि 'बाहुबली', 'आरआरआर' र 'केजीएफ' जस्ता चर्चित फिल्म वितरण गरिसकेको कम्पनीले 'हिमालयन गोल्ड'लाई भारतमा प्रदर्शन गर्न लागेको हो। नेपालमा एप्पल इन्टरटेनमेन्ट, जापानमा टोकियो ड्रिम इन्टरटेनमेन्ट र मध्यपूर्वमा फार्स फिल्म मोसन पिक्चर्सले वितरणको जिम्मा लिएका छन्।
नेपाल र भारतमा फिल्म एकसाथ प्रदर्शन हुन लागेको हो।
नेपालमा फिल्मको अग्रिम टिकट बिक्रीसमेत सुरू भइसकेको छ।


