नीर शाह, पूजा शर्मा र अशोक दर्जीसहितका कलाकारको अभिनय रहने फिल्म 'सेतो कोट' को शुभमुहूर्त गरिएको छ।
शिवम अधिकारीको लेखन तथा निर्देशनमा बन्ने फिल्मको शुक्रबार कोटेश्वरस्थित महादेवस्थान मन्दिरमा पूजाआजा गर्दै मुहूर्त गरिएको हो।
मुहूर्त कार्यक्रममा फिल्मका कलाकार तथा निर्माण टिमको उपस्थिति थियो। मुहूर्त सटमा अशोक दर्जी र पूजा शर्माले संवाद बोलेका थिए भने नीर शाहले निर्देशन गरेका थिए। शोभित बस्नेतले क्ल्याप दिएका थिए भने पत्रकार सरिता भारतीले क्यामेरा चलाएकी थिइन्। त्यस्तै, अभिनेता सुशान्त श्रेष्ठले नरिवल फुटाएका थिए।
मुहूर्तमा अभिनेता नीर शाहले सेतो रङको अभाव भइरहेको वर्तमान समयमा फिल्मले ‘सेतोपना’ जोगाउने अपेक्षा व्यक्त गरे। अशोक दर्जीले नयाँ टिमसँग काम गर्न पाउँदा उत्साहित रहेको बताए। यस्तै पूजा शर्माले फिल्मको कथा अहिले नै खुलाउन सक्ने अवस्था नरहेको संकेत गर्दै धेरै प्रश्न नगर्न आग्रह गरिन्।
फिल्ममार्फत अभिनयमा डेब्यु गर्न लागेकी 'माइली बुहारी' नामले परिचित सुमित्रा दाहालले आफूलाई हँसाउनभन्दा रूवाउन सहज हुने बताइन्। निर्मातासँगको कुराकानीपछि आफू फिल्ममा जोडिएको उनले बताइन्।
लेखक तथा निर्देशक शिवम अधिकारी यसअघि पटकथा लेखनमा बढी व्यस्त रहँदै आएका थिए। यसपटक भने निर्देशनका लागि पनि समय छुट्याएर काम गर्न लागेको उनले बताए।
फिल्मको कथामा मौलिकता, सामाजिक यथार्थ र भावनात्मक गहिराइलाई प्राथमिकता दिइएको निर्माण पक्षले जनाएको छ। नेपाली फिल्ममा कमै उठान हुने विषयलाई मनोरञ्जनात्मक शैलीमा प्रस्तुत गर्ने लक्ष्य राखिएको जनाइएको छ। कथाको मूल भाव र घटनाक्रमलाई भने निर्माण पक्षले गोप्य राखेको छ।
फिल्ममा नीर शाह, अशोक दर्जी, पूजा शर्मा र सुमित्रा दाहालसँगै पवन खतिवडा ‘बाबा’, विष्णु सापकोटा ‘हर्के हवलदार’, सुशान्त कुमार श्रेष्ठ, साम्राज्ञी थापा, सम्मान थापा, रामेश्वर रिजाल, दीपेन्द्र भण्डारी, कपिल खड्का, कृषा घिमिरे र सुप्रिया शर्मालगायत कलाकारको अभिनय रहनेछ।
अशोक दर्जीले 'मन बिनाको धन'बाट फिल्म अभिनयमा डेब्यू गरेका थिए। उनको दोस्रो फिल्म 'पार्वती' यसै वर्ष प्रदर्शनमा आएको थियो। यस्तै पूजा शर्माको नयाँ फिल्म '३६ को आँकडा' प्रदर्शनको तयारीमा छ।
मिनु शर्मा प्रोडक्सनको ब्यानरमा निर्माण हुन लागेको 'सेतो कोट'को निर्माता मिनु शर्मा र सन्देश थापा ‘काजी’ हुन्। कार्यकारी निर्मातामा फणीन्द्र तामाङ रहेका छन्। फिल्मको छायांकन काठमाडौं, मकवानपुरसहित नेपालको ग्रामीण भेगमा गरिनेछ।
सौरभ लामाले छायांकन गर्ने फिल्मलाई बन्दे प्रसादले सम्पादन गर्नेछन्।
