पछिल्ला दिनमा नेपाली बक्स अफिसमा दुई फिल्मको दबदबा छ। एउटा बलिउड फिल्म 'रामायण', अर्को नेपाली फिल्म 'बाटुलो जून'।
यी दुई फिल्मले दर्शकको साथ पाइरहँदा यसअघि रिलिज भएका अन्य फिल्मको व्यापार भने यतिबेला सुस्ताएको छ। यस्तो माहोलमा शुक्रबारदेखि हलमा थपिँदैछन् दुई नयाँ फिल्म।
फिल्म हुन्-'हिमालयन गोल्ड' र 'जलाकी'।
दुवै फिल्मको कथा र प्रस्तुति भने फरक छ। 'हिमालयन गोल्ड' थ्रिलर तथा ड्रामा जनरामा निर्माण भएको फिल्म हो। हिमाली क्षेत्रको परिवेशमा आधारित यस फिल्ममा यार्सागुम्बा र त्यसको लोभमा हुने संघर्षको कथा प्रस्तुत गरिएको छ।
फिल्ममा एक युवतीले आफ्नो परिवार र बहुमूल्य यार्सागुम्बाको बाली जोगाउन निर्दयी समूहसँग गर्ने संघर्षलाई देखाइएको छ। लोभ, अस्तित्वको लडाइँ, प्रतिशोध र साहसलाई फिल्मको कथामा समेटिएको छ। धिराज राजवंशी निर्देशित फिल्ममा सुनील थापा, परीक्षा लिम्बू, साजन थापा, कर्मा, मेनुका प्रधान, राहुल एन मुखिया, अंकित खड्का, सुनिल तामाङलगायत कलाकारको अभिनय छ।
फिल्मको रनटाइम २ घण्टा १८ मिनेट छ।
त्यस्तै, शुक्रबारबाटै प्रदर्शनमा आउन लागेको अर्को फिल्म हो 'जलाकी'। अशोक थापा मगर निर्देशित यो फिल्म प्रेमकथामा आधारित छ।
आशा, त्याग र संघर्षलाई केन्द्रमा राखेर निर्माण गरिएको फिल्मले मगर समुदायको सांस्कृतिक पहिचानलाई नयाँ दृष्टिकोणबाट प्रस्तुत गर्ने प्रयास गरेको छ।
भावनात्मक प्रेमकथासँगै आकर्षक दृश्य र कथावाचनमार्फत दर्शकको मन छुने लक्ष्य फिल्मले राखेको छ। फिल्ममा सोनाम तोप्देन, उपासना सिंह ठकुरी, शिल्पा मास्के, अस्तित्व भट्टचन, सहारा हाङ्मा लिम्बूलगायत कलाकारको अभिनय छ। फिल्मको रनटाइम २ घण्टा ५० मिनेट छ।
एकातर्फ थ्रिलर र पारिवारिक संघर्षको कथा बोकेको 'हिमालयन गोल्ड' छ भने अर्कोतर्फ प्रेम र सांस्कृतिक पहिचानलाई समेटेको 'जलाकी'।
फरक-फरक स्वादका यी दुई फिल्ममध्ये दर्शकले आफ्नो रूचि र चाहनाअनुसार फिल्म रोजेर हेर्न पाउनेछन्। दुवै फिल्मको अग्रिम बुकिङसमेत खुलिसकेको छ। तर दर्शकको रोजाइमा कुन फिल्म पर्छ र कुनले बढी साथ पाउँछ, त्यो भने केही दिनपछि मात्र थाहा हुनेछ।