'दर्पणछायाँ', 'लहना' र 'उपहार' जस्ता फिल्ममा सहकार्य गरेका निरूता सिंह र उत्तम प्रधानको जोडी कुनै समय नेपाली फिल्मका दर्शकमाझ निकै लोकप्रिय थियो। यो जोडीलाई दर्शकले आज पनि उत्तिकै सम्झिने गर्छन्। अब निरूता र उत्तम वर्षौंपछि फेरि एउटै फिल्ममा देखिँदैछन्।
यी दुईले दुई वर्षअघि एउटा म्युजिक भिडिओमार्फत वर्षौंपछि अभिनयमा सहकार्य गरेका थिए। अब भने उनीहरू फिल्म 'सारथी'मार्फत ठूलो पर्दामा एकसाथ देखिन लागेका हुन्।
कुमार गजुरेल निर्देशित फिल्मको ट्रेलर सार्वजनिक भइसकेको छ। फिल्म यही मंसिर ११ गतेदेखि देशभरका सिनेमा हलमा प्रदर्शन हुँदैछ।
फिल्मको कथा के हो? कस्तो छ ट्रेलर?

सार्वजनिक ट्रेलरमा दुर्गम गाउँको परिवेश र त्यहाँको जनजीवन समेटिएको छ। विशेषगरी आमा र छोराबीचको सम्बन्ध, संघर्ष र भावनात्मक उतारचढावलाई ट्रेलरको मुख्य कथाका रूपमा प्रस्तुत गरिएको छ।
फिल्ममा निरूता सिंह आमाको भूमिकामा देखिएकी छन् भने गिरी विश्वकर्माले छोराको भूमिका निर्वाह गरेका छन्। छोराको जीवनमा आइपर्ने कठिन परिस्थितिमा आमाले दिने साथ, माया र त्यागलाई ट्रेलरमा मर्मस्पर्शी ढंगले प्रस्तुत गरिएको छ।
निर्माण पक्षका अनुसार फिल्मले आफ्नी आमालाई जोगाउन संघर्ष गर्ने एक युवाको कथा भन्छ।
अभाव, सामाजिक विभेद र पहिचानका प्रश्नसँग जुधिरहेको उसको यात्रामार्फत फिल्मले माया, त्याग, पारिवारिक सम्बन्ध र मानवीय संवेदनालाई प्रस्तुत गरेको छ। म्याग्दीको गुर्जा क्षेत्रको मौलिक संस्कृति, परम्परा र ग्रामीण जीवनशैली पनि फिल्मको अर्को विशेषता हो। यस्तै, ट्रेलरमा उत्तम प्रधान र गायत्री जोशी पनि फरक भूमिकामा देखिएका छन्।
कुमार गजुरेलकै कथा, पटकथा तथा संवाद रहेको फिल्ममा मुकुन्द श्रेष्ठ, सम्रान्त थापा, राजेन्द्र केसी, मदन थापा, तुलसी राईलगायत कलाकारको पनि अभिनय छ।
फिल्मको छायांकन म्याग्दीको गुर्जा क्षेत्रमा गरिएको हो भने छायांकार संकल्प भुजेल हुन्।
तारा थापा ‘किम्भे’ प्रस्तुतकर्ता रहेको फिल्मको निर्मातामा रदिप श्रेष्ठ र प्रदीप रायमाझी छन्।
पुरानो पुस्ताका दर्शकका लागि उत्तम र निरूताको पुनर्मिलन तथा नयाँ पुस्ताका लागि ग्रामीण परिवेशमा आधारित फरक कथावस्तु फिल्मको आकर्षण बन्ने निर्माण टिमको अपेक्षा छ।