यसअघिसम्म पर्दामा प्रायः प्रेमकथाका भूमिकामा देखिएकी अभिनेत्री सुहाना थापा यस पटक फरक स्वरूपमा दर्शकमाझ आउँदैछिन्।
यही शुक्रबारदेखि प्रदर्शन तयारीमा रहेको फिल्म 'परालको आगो' मा उनी गाउँले युवती 'गौंथली' को भूमिकामा छिन्, जसले घरेलु हिंसा र मौन पीडाको कथा बोकेको छ।
गुरूप्रसाद मैनालीको कालजयी कृति 'परालको आगो' बाट प्रेरित फिल्ममा सुहानाले आफूलाई पूर्ण रूपमा बदल्न खोजेकी छन्।
'गौंथलीलाई बुझ्न मात्रै मलाई एक वर्ष लाग्यो,' सुहानाले भनिन्, 'पात्रबाट बाहिरिन फेरि ६ महिना लाग्यो।'
यो उनको अभिनय यात्राको नयाँ मोड पनि हुन सक्छ।
यो फिल्मको प्रस्ताव कोरियोग्राफर रामजी लामिछानेमार्फत सुहानाको परिवारसम्म पुगेको थियो। रामजीले सुहानाकी आमा झरना थापालाई फोन गरेर 'परालको आगो' बन्न लागेको र निर्माता सुशील पोखरेलसँग कुरा भएको जानकारी दिएका थिए।
त्यसपछि निर्देशक लक्ष्मण सुनार र निर्माता टोलीसँग भेटघाट भयो।
पहिलो भेटमा निर्देशक कथा लिएर गएका थिएनन्।
उनले भनेका थिए — परालको आगो जे हो, त्यही कथा हो।
कृतिमा आधारित फिल्म भएकाले सुहानाले पनि विश्वास गरिन्।
उनले विद्यालय जीवनमा भने 'परालको आगो' पढ्ने अवसर पाइनन्।
'म निजी स्कुल पढेँ। पश्चिमी साहित्य धेरै पढाइयो, तर यो कृतिबारे थाहा नै थिएन,' उनले भनिन्।
फिल्ममा अनुबन्ध भएपछि उनले सो किताब पढिन्। एक पटक होइन, पटक पटक। सुरूमा शीर्षकले सामान्य दाम्पत्य झगडाको कथा जस्तो लागे पनि पढ्दै जाँदा उनको बुझाइ बदलियो।
उनी भन्छिन्, 'यो लोग्ने–स्वास्नीको झगडाभन्दा धेरै ठूलो कुरा रहेछ। सामाजिक व्यंग्य रहेछ, घरेलु हिंसाबारे बोलेको कृति रहेछ। गुरूप्रसाद मैनाली असाध्यै नै सक्षम लेखक लाग्नुभयो।'
सुहाना यसअघि रोमान्टिक भूमिकामा बढी देखिएकी थिइन्। त्यसैले 'गौंथली' पात्र स्वीकार गर्नु चुनौतीपूर्ण थियो।
तर उनी मनोविज्ञानकी विद्यार्थी हुन्। त्यसैले मानसिक आघात, दबाब र भावनात्मक अवस्थाबारेको अध्ययनले आफूलाई सहयोग गरेको उनी बताउँछिन्।
'आघात भोगेका मानिसहरू भन्छन्, त्यो क्षणमा दिमाग शून्य हुन्छ। मैले पनि गौंथलीलाई त्यसरी बुझ्ने प्रयास गरेँ,' उनले भनिन्।
सहरमा हुर्किएकी सुहानाका लागि ग्रामीण जीवनको पात्र निर्वाह गर्नु सहज थिएन। फिल्मका लागि उनले छायांकनअघि करिब २०–२५ दिन गाउँमै बिताइन्।
त्यो अवधिमा उनले घाँस काट्ने, डोको बोक्ने, गोबर सोहोर्ने, गाउँको चालचलन बुझ्ने अभ्यास गरिन्।
-1776866932.jpg)
निर्देशक लक्ष्मण सुनारले उनलाई स्वतन्त्रता दिएका थिए।
'उहाँले गौंथली चरा हेर, उसले जति दुःख भए पनि घर बनाउन छोड्दैन, त्यही हेरेर पात्र बुझ भन्नुभयो,' उनी सम्झिन्छिन्।
गौंथलीको पीडा सुहानाले अभिनयमै सीमित राखिनन्। पात्रभित्र बसिरहँदा उनी सेटबाहिर पनि अनुशासित र मौन रहन्थिन्।
'दृश्य सकिएपछि पनि म पात्रमै हुन्थेँ। हाँस्न, रमाउन, बाहिर जान मन लाग्दैनथ्यो,' उनले भनिन्।
छायांकन सकिएपछि त्यो असर लामो समय रह्यो।
'इमानदारीपूर्वक भन्नुपर्दा, पात्रबाट बाहिरिन मलाई ६ महिना लाग्यो,' उनले बताइन्।
परालको आगोमा गौंथलीपछि उनले अर्को फिल्म 'बाः एक योद्धा' मा पनि घरेलु हिंसासँग जोडिएको आधुनिक पात्र पाएकी रहिछन्। यसमा काम गर्न सुरूमा अस्वीकार गरेकी थिइन्।
'मलाई लाग्यो, फेरि यस्तै पीडादायी पात्र गर्न सक्दिनँ। तर ममीले गर्नुपर्छ भन्नुभयो,' उनी भन्छिन्।
सुहाना चाहन्छिन्, फिल्म हेरेर नयाँ पुस्ताले समाजको पुरानो संरचना चिन्न सकोस्।
'मेरो हजुरआमा, आमाले पनि यस्तै सहनुभएको थियो होला। तर मबाट यो अन्त्य हुन्छ भन्ने सोच लिएर निस्किऊन्,' उनले भनिन्।
उनका अनुसार फिल्मको टिजर, ट्रेलर सार्वजनिक भएपछि धेरै महिलाले 'मैले आफ्नो कथा पाएँ' भनेर प्रतिक्रिया दिएका छन्।
'त्यो भनेको लुकेका गौंथलीहरू हुन्,' उनी भन्छिन्।
धेरै दर्शकले सुहानाको अभिनयमा आमा झरना थापाको झल्को देखिएको समेत टिप्पणी गरेका छन्। सुहाना यसलाई सम्मानका रूपमा लिन्छिन्।
'ममीले गाउँले भूमिका र रोनाधनामा धेरै काम गर्नुभएको थियो। उहाँले छोडेको छापको सम्झना दर्शकलाई आयो भने त्यो मेरो लागि ठूलो कुरा हो,' उनले भनिन्।
फिल्ममा सुहानासँग जोडीको भूमिकामा अभिनेता तथा गायक प्रकाश सपूत छन्। सुहाना उनलाई जिम्मेवार कलाकार मान्छिन्।
'हिरोइन' र प्रेमकथाकी नायिकाको छविमा सीमित सुहाना अब त्यो घेरा तोड्न खोज्दैछिन्।
'झलक र प्रचार सामग्रीले नै त्यो छवि केही हदसम्म फेरिदिएको लाग्छ। फिल्मपछि अझ स्पष्ट होला,' उनी हाँस्दै थप्छिन्, 'सायद मेरो अभिनयको दोस्रो अध्याय सुरू भयो।'
यसअघि परिवारकै ब्यानरका फिल्ममा बढी देखिएकी सुहाना अब बाहिरी ब्यानरका फिल्म पनि गर्न तयार छिन्।
उनका अनुसार पढाइ पूरा गर्न परिवारले पहिलो प्राथमिकता दिएको थियो। विदेशको प्रतिष्ठित विश्वविद्यालयबाट स्नातकोत्तर तह पूरा गरेपछि अहिले परिवारले पनि साथ दिएको सुहाना बताउँछिन्।
'पढाइ सकेँ, अब म पनि परिपक्व उमेरमा पुगेँ,' उनी भन्छिन्, 'यो क्षेत्र कसरी बुझ्ने, कसरी सामना गर्ने भन्ने थाहा हुँदै गयो।'
सुहानालाई सुरूआतमा अभिनयमा आउँछु भन्ने लागेको थिएन। फिल्म क्षेत्रमा लागे पनि पर्दाअघि होइन, निर्माण पक्षबाट जोडिने सोच थियो।
'मैले एक्टर बन्छु भन्ने सोचेको थिइनँ। आएँ भने पनि निर्माता वा निर्माण पक्षबाट आउँछु भन्ने लागेको थियो,' उनले भनिन्, 'ए मेरो हजुर २ मा पनि त्यसरी नै जोडिएकी थिएँ। पछि ए मेरो हजुर ३ मा सबैले अभिनय गर्नुपर्छ भन्नुभयो। के होला भन्ने लाग्यो, नबुझिकन प्रक्रिया अघि बढाएकी थिएँ। सबैले मन पराइदिनुभयो। ए मेरो हजुर ४ सम्म आइपुग्दा पनि दर्शकबाट धेरै माया पाएँ।'
यद्यपि बीचमा पढाइका कारण फिल्ममै निरन्तर लाग्ने कि नलाग्ने भन्ने अन्योल रहेको उनले सुनाइन्।
त्यो अन्योल चिर्न परालको आगोले धेरै सहज बनायो।
'यस्तै फरक पात्र र भूमिका आए भने काम गर्न चाहन्छु। अहिले अभिनयमा रमाइरहेकी छु। प्रेमकथाका भूमिकामा पनि फरक ढंगले गर्न सकिन्छ भन्ने लाग्छ,' सुहानाले भनिन्।
फरक पात्र र कथामा काम गर्ने चाहना बढ्दै गएको बताउने सुहाना यसपछि 'ए मेरो हजुर ५' को तयारीमा लाग्नेछिन्।
