गैरआवासीय नेपाली संघ (एनआरएनए) का पूर्वअध्यक्ष तथा वर्तमान नेतृत्वकर्ताहरूले संस्थागत एकता सुदृढ गर्दै विदेशमा रहेका नेपालीको ज्ञान, सीप, प्रविधि र पुँजी नेपालको समृद्धिमा परिचालन गर्नुपर्नेमा जोड दिएका छन्।
संघको स्थापना दिवस तथा दसैं, तिहार र छठ पर्वको अवसरमा आयोजित भर्चुअल अन्तरक्रियामा उनीहरूले विगतका विवाद र असमझदारीलाई अन्त्य गर्दै संस्थालाई एकताबद्ध बनाएर अघि बढाउनुपर्ने बताएका हुन्।
'हाम्रो विगतको सम्मान, हाम्रो भविष्यको निर्माण' मूल नाराका साथ आयोजित कार्यक्रममा संघको स्थापनाकालदेखिका अनुभव आदानप्रदान गर्नुका साथै संस्थाको एकता, सामूहिक लगानी, गैरआवासीय नेपालीका अधिकार र नेपालको विकासमा डायस्पोराको योगदानबारे छलफल भएको थियो।
एनआरएनएका अध्यक्ष डा. हेमराज शर्माले विगतका असमझदारीलाई पछाडि पार्दै संघले बाढीपहिरो प्रभावित क्षेत्रमा ४५ दिनसम्म राहत वितरण र स्वास्थ्य शिविर सञ्चालन गरेको बताए।
नागरिकता, मतदान अधिकार र सामूहिक लगानीका विषयमा सरकारसँग संवाद भइरहेको उल्लेख गर्दै उनले संस्थालाई सबैलाई समेटेर अघि बढाउने प्रतिबद्धता व्यक्त गरे।
संस्थापक अध्यक्ष डा. उपेन्द्र महतोले आगामी महाधिवेशनमा सर्वसम्मत नेतृत्व चयन गरेर एकताको सन्देश दिनुपर्ने बताए।
गैरआवासीय नेपालीको प्रतिष्ठा संस्थाको मजबुतीसँग जोडिएको उल्लेख गर्दै उनले विदेशमा रहेका नेपालीको पुँजी र दोस्रो पुस्ताको ज्ञान तथा सीपलाई समृद्ध नेपाल निर्माणमा उपयोग गर्नुपर्नेमा जोड दिए।
पूर्वअध्यक्ष जीवा लामिछानेले गैरआवासीय नेपालीको व्यक्तिगत क्षमताभन्दा सामूहिक शक्ति बलियो हुने बताए।
पछिल्लो समय खस्किएको संस्थाको साख पुनः स्थापित गर्नुपर्ने उल्लेख गर्दै उनले सामूहिक लगानी र सहकार्यलाई प्राथमिकता दिनुपर्ने धारणा राखे।
पूर्वअध्यक्ष भवन भट्टले संघका चुनौतीलाई सिकाइका रूपमा लिनुपर्ने बताए। संस्थालाई प्रभावकारी बनाउन संरचनागत सुधार र प्रविधिमैत्री प्रणाली आवश्यक रहेको उनको भनाइ थियो।
त्यस्तै, पूर्वअध्यक्ष महेश श्रेष्ठले गैरआवासीय नेपालीको सामूहिक लगानी नेपालको समृद्धिको महत्त्वपूर्ण आधार बन्न सक्ने बताए।
१० अर्ब रूपैयाँको डायस्पोरा इन्भेस्टमेन्ट कम्पनी र एनआरएन नेपाल डेभलपमेन्ट फन्डजस्ता पहललाई प्रभावकारी बनाएर सरकारको विश्वास आर्जन गर्नुपर्ने उनले बताए।
पूर्वअध्यक्ष डा. बद्री केसीले संस्थागत एकता कायम राख्दै वैदेशिक रोजगारीमा रहेका नेपालीका समस्या समाधान र गैरआवासीय नेपालीका अधिकारका लागि काम गर्नुपर्ने बताए।
संघको पहलमा गैरआवासीय नेपालीसम्बन्धी कानुन निर्माण तथा वैदेशिक रोजगारीमा रहेका नेपालीको अधिकार र सुरक्षाका विषयमा महत्त्वपूर्ण काम भएको उनको भनाइ थियो।
पूर्वअध्यक्ष विनोद कुँवरले एकता प्रक्रियालाई पूर्णता दिन विगतमा भएका सहमति कार्यान्वयन गर्नुपर्ने बताए।
विदेशमा रहेका नेपालीको ज्ञान, सीप, प्रविधि र सामूहिक लगानीलाई नेपालको विकाससँग जोड्नुपर्ने उल्लेख गर्दै उनले सबै पक्षलाई समेटेर अघि बढ्नुपर्ने धारणा राखे।
पूर्वअध्यक्ष आरके शर्माले आगामी १० वर्षका लागि स्पष्ट कार्ययोजना बनाएर संघलाई व्यक्ति वा नेतृत्व केन्द्रित नभई एजेन्डा केन्द्रित बनाउनुपर्ने बताए।
रेमिट्यान्सको ठूलो हिस्सा उपभोगमा खर्च भइरहेको अवस्थामा सामूहिक लगानीलाई प्रोत्साहन गर्नुपर्ने र एनआरएन नेपाल डेभलपमेन्ट फन्डलाई साना लगानीकर्ता तथा वैदेशिक रोजगारीमा रहेका नेपालीको हितसँग जोड्नुपर्ने उनको भनाइ थियो।
कार्यक्रममा अमेरिका, हङकङलगायत विभिन्न देशका प्रतिनिधिहरूले पनि संघको सुदृढीकरण, कृषि तथा कफी खेतीजस्ता उत्पादनमूलक क्षेत्रमा लगानी र दोस्रो पुस्तालाई संस्थामा जोड्ने विषयमा सुझाव दिएका थिए।
महासचिव डा. चिरञ्जीवी खड्का तथा उपमहासचिव दिनेश घिमिरे, डा. नवराज रौसियार र दीपक गौतमले सञ्चालन तथा सहजीकरण गरेको अन्तरक्रिया तीन घण्टासम्म चलेको थियो।
.JPG)
-1746513231.jpg)
