नेपाली श्रमिकको संख्या धेरै रहेका मुलुकमा समस्यामा परेका श्रमिकको उद्धार तथा तत्काल बसोबासका लागि सेल्टर हाउस स्थापना गर्न एनआरएनएले नेपाल सरकारसँग आग्रह गरेको छ।
चीनको गोन्जाउमा शनिबारदेखि जारी एनआरएनए एसिया प्यासिफिक क्षेत्रीय सम्मेलनअन्तर्गत ‘सुरक्षित वैदेशिक रोजगार र पुनःएकीकरण’ विषयक सत्रमा सहभागीहरूले श्रमिक समस्यामा पर्दा सुरक्षित रूपमा राख्ने व्यवस्था नहुँदा एनआरएनए प्रतिनिधिहरूले समेत समस्या भोग्नुपरेको भन्दै सरकारले सम्बन्धित मुलुकमा सेल्टर हाउस स्थापना गर्नुपर्ने माग गरेका हुन्।
सम्मेलनमा एसिया प्यासिफिक क्षेत्रमा सुरक्षित वैदेशिक रोजगार, सीपयुक्त जनशक्ति, विभिन्न देशमा रहेका नेपाली श्रमिकका समस्या, समाधानका उपाय तथा स्वदेश फर्किएपछि पुनःएकीकरणका विषयमा छलफल भएको थियो।
एनआरएनए उपाध्यक्ष तथा सत्रका सभापति खगेन्द्र न्यौपानेले धेरै नेपाली श्रमिक रहेका मुलुकमा सरकारले नै सेल्टर हाउस स्थापना गर्नुपर्ने बताए।
श्रमिक समस्यामा पर्दा तत्काल सुरक्षित स्थानमा राख्ने व्यवस्था नहुँदा एनआरएनए प्रतिनिधिहरूले आफ्नै पहलमा व्यवस्थापन गर्नुपर्ने र कतिपय अवस्थामा त्यसकै कारण जेल जानुपर्ने अवस्थासमेत आउने गरेको उनको भनाइ थियो।
न्यौपानेले वैदेशिक रोजगारीमा जाने नेपालीलाई सीप सिकाएर मात्र पठाउने व्यवस्था गर्नुपर्नेमा पनि जोड दिए।
त्यसका लागि सरकार र एनआरएनएको सहकार्यमा स्किल एकेडेमी तथा सीप परीक्षण केन्द्र स्थापना गर्नुपर्ने उनको भनाइ थियो।
उनले विदेशमा नेपालीलाई समस्या पर्दा एनआरएनए प्रतिनिधिले तत्काल सहयोग गर्दै आए पनि कानुनी मान्यता नहुँदा समस्या हुने गरेको भन्दै एनआरएनए प्रतिनिधिलाई अनररी अर्थात् अवैतानिक श्रमिक दूतका रूपमा मान्यता दिन पनि सरकारसँग आग्रह गरे।
प्रतिनिधि सभाका सांसद तथा पूर्वसञ्चारमन्त्री जगदीश खरेलले विदेशमा रहेका एनआरएनहरूले राजदूतसरह नेपालीको समस्या समाधानका लागि काम गरिरहेको भन्दै प्रशंसा गरे।
अवैतानिक दूतको पद सानो देखिए पनि नेपाली श्रमिकका समस्या समाधानका लागि महत्वपूर्ण भूमिका निर्वाह गर्न सक्ने भन्दै उनले आवश्यक विषयमा सरकारसमक्ष पहल गर्ने प्रतिबद्धता जनाए।
खरेलले प्रवासमा रहेका नेपालीका समस्या सरकार र राष्ट्रिय स्वतन्त्र पार्टीले नजिकबाट बुझेको उल्लेख गर्दै समाधानका लागि काम गर्ने बताए। उनले वैदेशिक रोजगारीमा जाने श्रमिकको सीप विकासका लागि सबै पक्षबीच सहकार्य आवश्यक रहेको पनि बताए।
प्रतिनिधि सभाका सांसद ऐन महरले वैदेशिक रोजगारीलाई व्यवस्थित, सुरक्षित र मर्यादित बनाउनुपर्ने बताए। नेपाललाई अदक्ष कामदार पठाउने देशका रूपमा मात्र चिनिने अवस्थाको अन्त्य गर्न सीप विकासमा विशेष ध्यान दिनुपर्ने उनको भनाइ थियो।
परराष्ट्र मन्त्रालयको डायस्पोरा समन्वय महाशाखाका उपप्रमुख कृशु क्षेत्रीले विदेशमा नेपाली दूतावास तथा नियोगपछि नेपालीले एनआरएनएलाई नै सम्झने गरेको बताए।
सरकारले औपचारिक रूपमा मान्यता नदिए पनि एनआरएनहरूले व्यवहारमा श्रमिक दूतकै रूपमा काम गरिरहेको भन्दै उनले एनआरएनएको भूमिकाको प्रशंसा गरे।
एनआरएनए अध्यक्ष डा. हेमराज शर्माले वैदेशिक रोजगारीको क्षेत्रमा अझ धेरै काम गर्नुपर्ने भएकाले बृहत् छलफल आवश्यक रहेको बताए। उनले केही महिनाभित्रै नेपालमा वैदेशिक रोजगारसम्बन्धी छुट्टै बृहत् सम्मेलन आयोजना गर्ने जानकारी दिए।
एनआरएनए उपाध्यक्ष जुनु गुरुङले वैदेशिक रोजगारीमा रहेका नेपालीको मानसिक स्वास्थ्यका विषयमा भइरहेको काम तथा आगामी दिनमा सञ्चालन गरिने कार्यक्रमबारे जानकारी दिइन्।
वैदेशिक रोजगारीका क्रममा देखिने मानसिक स्वास्थ्यसम्बन्धी समस्या पहिचान र समाधानका लागि थप कार्यक्रम आवश्यक रहेको उनको भनाइ थियो।
सम्मेलनले वैदेशिक रोजगारीमा अदक्ष कामदार मात्र नभई दक्ष जनशक्ति पठाउन सीप सिकाउने तालिम केन्द्र तथा सीप परीक्षण केन्द्र स्थापना गर्न पनि सरकारसँग आग्रह गरेको छ। सीपयुक्त जनशक्ति उत्पादन र विदेश पठाउने व्यवस्था गर्न सरकार, निजी क्षेत्र तथा एनआरएनएबीच सहकार्य आवश्यक रहेको सहभागीहरूले बताएका छन्।
त्यस्तै, विभिन्न देशमा रहेका एनआरएन प्रतिनिधिले त्यहाँ समस्यामा परेका नेपालीलाई तत्काल उद्धार, कानुनी तथा अन्य सहयोग गर्दै आए पनि औपचारिक कानुनी अधिकार नहुँदा समस्या हुने गरेको बताएका थिए।
एनआरएनएले यसअघि नै नेपाल सरकारलाई एनआरएनए प्रतिनिधिलाई अवैतानिक श्रमिक दूतका रूपमा मान्यता दिन ध्यानाकर्षण गराए पनि कार्यान्वयन नभएकाले सम्मेलनमा पुनः माग उठाइएको हो।
कार्यक्रममा विभिन्न मुलुकमा रहेका नेपाली श्रमिकको अवस्था, समस्या तथा समाधानका उपायबारे विषयगत प्रस्तुति गरिएको थियो। एकनाथ ढकालले लाओस, दीपक पुनले दक्षिण कोरिया, खगराज गौतमले जापान, तिलोचन गौतमले मलेसिया, युवराज न्यौपानेले मकाउ लगायतका देशमा रहेका नेपाली श्रमिकको अवस्थाबारे जानकारी प्रस्तुत गरेका थिए।
पत्रकार अनिल अधिकारीले पनि सम्बन्धित विषयमा प्रस्तुति दिँदै श्रमिकका समस्या र समाधानका उपायबारे प्रकाश पारे।
एनआरएनएले नेपालमा केही समयपछि वैदेशिक रोजगारसम्बन्धी छुट्टै बृहत् सम्मेलन आयोजना गरी सुरक्षित वैदेशिक रोजगार, सीप विकास, श्रमिक अधिकार, उद्धार तथा पुनःएकीकरणलगायतका विषयमा सरकार, सरोकारवाला निकाय र प्रवासी नेपालीबीच थप छलफल गर्ने जनाएको छ।
