नेपाल राष्ट्र बैंकले चालु आर्थिक वर्षको तेस्रो त्रैमास (माघदेखि चैतसम्म)को अवधिमा पाँच वाणिज्य बैंकलाई कारबाही गरेको छ।
राष्ट्र बैंकले नेपाल बैंकका सञ्चालक, स्ट्याण्डर्ड चार्टर्ड बैंक, राष्ट्रिय वाणिज्य बैंक, कुमारी र लक्ष्मी सनराइज बैंकलाई कारबाही गरेको हो।
नेपाल बैंकका सञ्चालक र स्ट्याण्डर्ड चार्टर्ड बैंकलाई नगद जरिवाना नै गराएको छ।
नेपाल बैंकका तत्कालीन अध्यक्ष डा. चन्द्र बहादुर अधिकारीले पदको दुरूपयोग गरेको भन्दै पाँच लाख रूपैयाँ जरिवाना गरिएको हो।
ऋण मिलाइदिने भन्दै आर्थिक लाभ लिएको प्रमाणित भएपछि राष्ट्र बैंकको पत्राचारसँगै उनी अध्यक्षबाट निलम्बित भएका थिए।
बैंकको रणनीतिक योजना, वार्षिक बजेट तथा कार्यक्रम प्रभावकारी रूपमा कार्यान्वयन गराउन नसकेको, बजेट तथा कार्यक्रम र रणनीतिक योजनाबीच प्रभावकारी तादात्म्यता गराउन नसकेको लगायतको आधारमा नेपाल बैंकका प्रमुख कार्यकारी अधिकृतलाई सचेत गराइएको छ।
त्यस्तै, स्ट्याण्डर्ड चार्टड बैंकले तोकिए अनुसार निर्देशित कर्जा लगानी नगरेको भन्दै बैंकलाई १४ करोड ८५ लाख रूपैयाँ जरिवाना गरिएको छ।
राष्ट्रिय वाणिज्य बैंकलाई सुक्ष्म निगरानी वर्गमा राख्नु पर्ने कर्जा सोही अनुसार वर्गीकरण नगरेको, कर्जाहरूलाई कर्जाको भाखा नाघेको अवधिको आधारमा वर्गीकरण नगरेको, नियम अनुसार जोखिम भार गणना नगरेका, चालुपुँजी कर्जा सम्बन्धी मार्गदर्शनका कतिपय व्यवस्था पूरा नगरेको लगातको आधारमा सचेत गराइएको छ।
कुमारी बैंकले पनि सुक्ष्म निगरानी वर्गमा राख्नु पर्ने कर्जा सोही अनुसार वर्गीकरण नगरेको र न्यूनतम कर्जा नोक्सानी व्यवस्था कायम नगरेको भन्दै सचेत गराइएको छ।
लक्ष्मी सनराइज बैंकका प्रमुख कार्यकारी अधिकृतलाई वित्तीय संस्थालाई जारी गरिएको निर्देशनहरूको पालना नगरेको भन्दै नसिहत दिइएको हो।
बैंकको संस्थापकको सोही बैंकमा कल खाता तथा चालु खाता सञ्चालन हुँदै आइरहेको र चालु खातामा विभिन्न मितिमा दैनिक मौज्दात रकम ऋणात्मक रहे पनि नियमविपरीत अप्रत्यक्ष रूपमा कर्जा सुविधा उपलब्ध गराएको थियो।
त्यस्तै, नीतिगत व्यवस्था रहेका कर्जाका प्रोडक्ट पेपरहरू सञ्चालक समितिबाट स्वीकृत हुनुपर्नेमा प्रमुख कार्यकारी अधिकृतबाट नै स्वीकृत गर्ने गरिएको पाइएको थियो।
