आन्तरिक राजस्व विभागले असार महिनाको विद्युत खपतमा मूल्य अभिवृद्धि कर (भ्याट) नलाग्ने स्पष्ट गरेको छ। आर्थिक ऐन, २०८३ अनुसार साउन १ गतेदेखि भएको विद्युत खपतमा मात्र भ्याट लाग्ने विभागले जनाएको छ।
साउन १ गतेदेखि जारी भएका केही विद्युत बिलमा असारको खपतमा पनि भ्याट लगाइएको भन्ने गुनासो आएपछि विभागले सार्वजनिक सूचना जारी गर्दै कानुनी व्यवस्था स्पष्ट गरेको हो।
विभागका अनुसार आर्थिक ऐन, २०८३ ले विद्युत सेवामा भ्याट लगाउने व्यवस्था गरेको भए पनि यो व्यवस्था साउन १ गतेदेखि लागू भएको हो। त्यसअघि अर्थात् असार ३२ गतेसम्म भएको विद्युत खपतमा भ्याट लाग्दैन।
त्यसैले साउन १ गते वा त्यसपछि बिल तिरे पनि असारसम्मको विद्युत खपतमा भ्याट असुल गर्न नमिल्ने विभागले जनाएको छ।
तर, साउन १ गतेदेखि भएको विद्युत खपतमा भने नेपाल विद्युत प्राधिकरणले स्वीकृत महसुलअनुसार लिने न्यूनतम शुल्क (डिमान्ड चार्ज) सहित विद्युत सेवामा भ्याट लाग्ने विभागले स्पष्ट पारेको छ।
विभागले उपभोक्ता, नेपाल विद्युतप्राधिकरण र सम्बन्धित सबै पक्षलाई यही व्यवस्थाअनुसार बिलिङ र भ्याट असुल गर्न आग्रह गरेको छ।
सरकारले घरायसी प्रयोजनमा ५० युनिटभन्दा माथिको बिलमा ५ प्रतिशत भ्याट लाग्ने व्यवस्था गरेको छ। आैद्योगिक तथा संस्थागत प्रयोगमा भने १३ प्रतिशत भ्याट लाग्नेछ।
