प्रधानमन्त्री बालेन शाहले निजी क्षेत्र र अर्थतन्त्रसँग सम्बन्धित सरोकारवालाहरूसँग शृंखलाबद्ध भेटघाट गरिरहेका बेला अर्थमन्त्री स्वर्णिम वाग्लेले पनि मंगलबार उत्पादनमूलक उद्योगका प्रतिनिधिसँग भेटेर छलफल गरेका छन्।
प्रधानमन्त्री शाहले असार २४ गतेयता विभिन्न समूहगत उद्योगी व्यवसायीलाई भेट्दै आएका छन्। पुँजी बजारलाई केन्द्रित गरेर लगानीकर्ता र नियमकीय प्रमुखहरूलाई पनि भेटेका छन्। ती कुनै पनि भेटमा अर्थमन्त्रीको उपस्थिति नरहेकाले प्रधानमन्त्रीले उनलाई 'बाइपास' गरेको भनी प्रश्न उठ्दै आएको छ।
अर्थमन्त्री वाग्लेले मंगलबार उद्योगीहरूसँगको भेटमा त्यही आशंका चिर्ने प्रयास गरेका छन्।
उनले उद्योगीहरूलाई दिएका चार मुख्य सन्देशमध्ये प्रधानमन्त्रीसँग आफ्नो पूर्ण समन्वय छ भन्ने पनि एक हो।
अर्थमन्त्री वाग्लेले प्रधानमन्त्री र आफूबीच अर्थतन्त्रका विषयमा कुनै मतभेद नरहेको स्पष्ट पारेका छन्। प्रधानमन्त्रीले निजी क्षेत्रसँग 'नो फिल्टर' संवाद गर्न सकून् भन्ने उद्देश्यले नै ती बैठकहरूमा आफू उपस्थित नरहेको उनको भनाइ छ।
'प्रधानमन्त्री र मबीच अर्थतन्त्रका विषयमा अत्यन्तै नजिकको समन्वय छ। निजी क्षेत्रसँग उहाँको प्रत्यक्ष संवाद होस् भन्ने हाम्रो चाहना हो,' उनले भने।
प्रधानमन्त्रीले निजी क्षेत्रका समस्या गहिरोसँग बुझिरहेको उल्लेख गर्दै उनले भने, 'उहाँले वस्तुको दरजस्ता साना विषयमा समेत मन्त्रीहरूसँग फलोअप गर्नुहुन्छ। हरेक मन्त्रिपरिषद बैठकपछि ३० देखि ५० मिनेटसम्म अर्थतन्त्रका विषयमा विस्तृत छलफल हुन्छ।'
अर्थमन्त्री वाग्लेले दिएको दोस्रो सन्देश लगानीमैत्री वातावरण बनाउनेसँग सम्बन्धित छ।
सरकारले लगानीमैत्री प्रशासन र डिजिटल सेवा विस्तारलाई प्राथमिकतामा राखेको उनले बताए।
अर्थतन्त्रसँग सम्बन्धित ४२ वटा ऐन यसै वर्ष संशोधन वा खारेज गर्ने प्रक्रिया अघि बढेको जानकारी दिँदै उनले प्रशासनिक झन्झट घटाउने प्रतिबद्धता जनाए।
'लगानीकर्ताले सहज सेवा पाउने वातावरण बनाउन कानुन र प्रशासन दुवै परिवर्तन गरिन्छ,' उनले भने।
बजेटलाई निजी क्षेत्रका प्रमुख संस्थाले स्वागत गरेको उल्लेख गर्दै त्यसले सरकारका सुधारप्रति विश्वास बढाएको पनि उनले बताए।
उनको तेस्रो सन्देश हो - उद्योग विस्तार, नयाँ लगानी र उत्पादन वृद्धि सरकारको लक्ष्य।
सरकारको भूमिका उद्योग सञ्चालन गर्नु नभई उद्योग फस्टाउने वातावरण बनाउनु रहेको वाग्लेले बताएका छन्।
सञ्चालनमा रहेका उद्योगले पूर्ण क्षमतामा उत्पादन गर्न सक्ने, उद्योगीले आत्मविश्वासका साथ व्यवसाय विस्तार गर्न सक्ने र नयाँ उद्योग तथा लगानी भित्रिने वातावरण बनाउनु सरकारको प्राथमिकता रहेको उनको भनाइ छ।
'सरकारले आफै उद्योग चलाउने होइन, उद्योग फस्टाउने वातावरण बनाउने भूमिका निर्वाह गर्छ,' उनले भने।
उत्पादन लागत, जग्गा, विद्युत, श्रम, ढुवानी, वित्त, कच्चापदार्थ र बजारसँग सम्बन्धित अवरोध प्रतिवेदनमा मात्र होइन, व्यवहारमै समाधान गरिने उनले बताए।
तत्काल समाधानको संस्कृति र लगानी सुरक्षाको प्रतिबद्धता अर्थमन्त्री वाग्लेले दिएको चौथो सन्देश हो।
उद्योगीले उठाएका समस्या तत्काल सम्बोधन गर्न अर्थ मन्त्रालयमा उच्च प्राथमिकताका साथ 'रेस्पोन्स डेस्क' स्थापना गरिने वाग्लेले जानकारी दिए।
'अब समस्या थन्क्याउने होइन, समाधान गर्ने कार्यसंस्कृति विकास गर्छौं,' उनले भने।
बजेटमा घोषणा भएका सुधार, पुँजीगत खर्च वृद्धि, आयोजना कार्यान्वयन, वित्तीय क्षेत्र र पुँजी बजार सुधारलाई तीव्र बनाइने उल्लेख गर्दै उनले आयातमुखी अर्थतन्त्रलाई उत्पादन र निर्यातमुखी अर्थतन्त्रमा रूपान्तरण गर्ने सरकारको लक्ष्य रहेको बताए।
'निजी क्षेत्रको सफलता नै राष्ट्रिय अर्थतन्त्रको सफलता हो। लगानीको सुरक्षा, उचित प्रतिफल र उद्यमीको सम्पत्तिको सुरक्षा सरकारको उच्च प्राथमिकतामा रहनेछ,' उनले भने।
भेटमा नेपाल उद्योग वाणिज्य महासंघका निवर्तमान अध्यक्ष चन्द्र ढकाल, महासंघका पूर्वअध्यक्ष पशुपति मुरारका, नेपाल उद्योग परिसंघका निवर्तमान अध्यक्ष राजेश अग्रवाल, उद्योगी भरत आचार्य, सेयर लगानीकर्ता अम्बिका पौडेल, सूर्य नेपालका उपाध्यक्ष रवि केसी लगायतको सहभागिता थियो।
