बजारमा उपभोग्य वस्तुको मूल्यवृद्धि तीव्र भएको छ।
नेपाल राष्ट्र बैंकका अनुसार चालु आर्थिक वर्ष २०८३/८४ को असोजमा वार्षिक विन्दुगत उपभोक्ता मुद्रास्फीति ६.३७ प्रतिशत पुगेको छ।
अघिल्लो वर्षको असोजमा यस्तो मुद्रास्फीति १.४७ प्रतिशत मात्रै थियो।
यसरी एक वर्षको अवधिमा मुद्रास्फीति ४.९० प्रतिशत विन्दुले बढेको छ।
राष्ट्र बैंकले सार्वजनिक गरेको मासिक आर्थिक प्रतिवेदनअनुसार चालु आर्थिक वर्षको पहिलो तीन महिनाको औसत मुद्रास्फीति ६.२२ प्रतिशत पुगेको छ।
अघिल्लो वर्षको सोही अवधिमा यस्तो दर १.६७ प्रतिशत थियो।
असोजमा खाद्य तथा पेय पदार्थ समूहको मूल्यवृद्धि ८.०४ प्रतिशत पुगेको छ।
अघिल्लो वर्षको सोही महिनामा यो समूहको मुद्रास्फीति २.५४ प्रतिशत ऋणात्मक थियो।
अर्थात् गत वर्षको तुलनामा खाद्य वस्तुको मूल्य वृद्धिमा ठूलो परिवर्तन आएको छ।
गैरखाद्य तथा सेवा समूहको मुद्रास्फीति पनि बढेको छ।
समीक्षा महिनामा यो समूहको मुद्रास्फीति ५.४६ प्रतिशत पुगेको छ।
अघिल्लो वर्षको असोजमा यस्तो दर ३.८० प्रतिशत थियो।
खाद्य तथा पेय पदार्थ समूहमा सबैभन्दा धेरै घ्यू तथा तेलको मूल्य बढेको छ।
यसको मूल्यवृद्धि १६.४४ प्रतिशत छ। फलफूलको मूल्य १५.४६ प्रतिशत बढेको छ।
चिनी तथा चिनीजन्य पदार्थको मूल्य ११.८४ प्रतिशत बढेको छ।
माछा तथा मासुको मूल्य ८.९१ प्रतिशत र मरमसलाको मूल्य ७.७१ प्रतिशत बढेको छ।
तरकारीको मूल्य पनि ७.२८ प्रतिशतले बढेको राष्ट्र बैंकको प्रतिवेदनमा उल्लेख छ।
गैरखाद्य तथा सेवा समूहमा यातायातको मूल्य सबैभन्दा धेरै बढेको छ।
समीक्षा महिनामा यातायात उपसमूहको मूल्यवृद्धि १२.९७ प्रतिशत छ।
मदिराजन्य पेय पदार्थको मूल्य ८.८३ प्रतिशत बढेको छ।
कपडा तथा जुत्ताचप्पलको मूल्य ७.०६ प्रतिशत बढेको छ।
फर्निसिङ तथा घरायसी उपकरणको मूल्य ६.०१ प्रतिशत र सुर्तीजन्य पदार्थको मूल्य ५.४५ प्रतिशत बढेको छ।
क्षेत्रगत रूपमा हेर्दा ग्रामीण क्षेत्रमा मूल्यवृद्धि सहरी क्षेत्रभन्दा बढी छ।
असोजमा ग्रामीण क्षेत्रको मुद्रास्फीति ६.६३ प्रतिशत र सहरी क्षेत्रको ६.२८ प्रतिशत रहेको छ।
प्रदेशगत रूपमा मधेशमा सबैभन्दा धेरै मूल्यवृद्धि भएको छ। त्यहाँ वार्षिक विन्दुगत मुद्रास्फीति ७.३७ प्रतिशत छ।
सबैभन्दा कम सुदूरपश्चिम प्रदेशमा ५.१३ प्रतिशत छ।
त्यस्तै, काठमाडौं उपत्यकामा मुद्रास्फीति ५.९२ प्रतिशत रहेको छ।
तराईमा ६.८८ प्रतिशत, पहाडमा ६.१४ प्रतिशत र हिमाली क्षेत्रमा ५.५७ प्रतिशत रहेको राष्ट्र बैंकले जनाएको छ।