नेकपा एमालेको ११ औं महाधिवेशन मंसिर २७ गतेदेखि २९ गतेसम्म हुने भएको छ।
अध्यक्ष केपी शर्मा ओलीले मंसिर मसान्तमा महाधिवेशन गर्ने राजनीतिक प्रस्तावमा समावेश गरेका थिए।
उक्त प्रस्ताव शुक्रबार साँझको केन्द्रीय कमिटी बैठकले पारित गरेसँगै ११ औं महाधिवेशन मंसिर २७ देखि २९ गतेसम्म हुने निश्चित भएको हो।
महाधिवेशन पोखरामा हुनेछ।
अध्यक्ष ओलीको राजनीतिक प्रतिवेदन पारित गर्ने क्रममा भने विवाद देखा परेको थियो।
अध्यक्ष ओलीको राजनीतिक प्रतिवेदन पारित भएको जनाउ दिँदै केन्द्रीय सदस्यहरूले ताली बजाएपछि नेताहरू युवराज ज्ञवाली र अष्टलक्ष्मी शाक्यले उठेर आफूहरूको फरक मत रहेको बताएका हुन्।
अध्यक्ष ओलीले प्रतिनिधि सभा विघटनको विरोध गर्दै पुनर्स्थापनाको मुद्दा पार्टीले अघि बढाउने गरी राजनीतिक प्रतिवेदन पेस गरेका थिए र सोही प्रतिवेदन पारित भएपछि नेताहरू ज्ञवाली र शाक्यले विरोध गरेका हुन्।
ज्ञवाली र शाक्यले फरक मतका रूपमा प्रतिनिधि सभा पुनर्स्थापनाभन्दा पनि चुनावमा भाग लिनुपर्ने कुरा राखेका छन्।
सरकारले फागुन २१ गतेका लागि चुनाव घोषणा गरेकोले केन्द्रीय कमिटीले चुनावमा जाने निर्णय गर्नुपर्ने उनीहरूको भनाइ थियो।
केन्द्रीय समितिमा एक सय ५० जना हाराहारी केन्द्रीय सदस्यहरूले चुनावमा भाग लिनुपर्ने कुरा राखे पनि त्यसलाई नेतृत्वले बेवास्ता गरेको भन्दै आलोचना भएको छ।
प्रचार विभाग प्रमुख राजेन्द्र गौतमले जेनजी पुस्ताले अघि सारेका माग पूरा गर्न पनि प्रतिनिधि सभा पुनर्स्थापना हुनुपर्ने भएकोले यो मुद्दा अघि बढाउने पक्षमा एमालेले निर्णय गरेको बताए।
‘जेनजीका माग सम्बोधन गर्ने आधिकारिक थलो प्रतिनिधि सभा हो,’ उनले भने, ‘एमाले निर्वाचनभन्दा पर छैन तर यो सरकारले निर्वाचनको वातावरण बनाउन सकेको छैन। हामी जेनजीका माग पूरा गर्न पनि प्रतिनिधि सभा पुनर्स्थापनाका पक्षमा उभिएका हौं।’
एमाले केन्द्रीय कमिटी बैठक सकेर अध्यक्ष ओली निवास गुण्डुतिर लागेका छन्। उनी केन्द्रीय कमिटी बैठक कक्षबाट बाहिर निस्कँदा पार्टीनिकट युवाहरूले 'केपी ओली वी लभ यू’ भन्ने नारा लगाएका थिए।
1635339834.jpeg)
-1746009348.jpg)
