त्रिभुवन अन्तर्राष्ट्रिय विमानस्थल अनुगमनमा पुगेका राष्ट्रिय स्वतन्त्र पार्टी (रास्वपा) का सांसद जगदीश खरेल (दोलखाबाट निर्वाचित) ले आक्रोशित हुँदै एक महिला कर्मचारीलाई हप्कीदप्की गरेको भिडिओ सामाजिक सञ्जालमा भाइरल बनेको छ।
सोमबारको उक्त भिडिओमा सांसद खरेलले आक्रोशित हुँदै कुरा गरेका महिला कर्मचारी विमानस्थलको टर्मिनल व्यवस्थापन कम्पनी आइएमएस सर्भिसेजकी प्रमुख कार्यकारी (सिइओ) चारू श्रेष्ठ हुन्।
सांसद खरेलले सुरूमा आगमन कक्षतर्फ आफन्त कुरेर बस्ने ठाउँ (वेटिङ हल) मा छिर्न पैसा तिर्नुपर्ने नियम 'तुरून्तै बन्द गर्ने कि नगर्ने?' भन्दै पैसा तिर्ने काउन्टरका कर्मचारीलाई सोध्छन्।
काउन्टरका कर्मचारीले यसबारे माथिल्लो निकायमा कुरा गर्न सुझाएपछि सांसद खरेल र अर्का एक सांसद आइएमएसकी सिइओ श्रेष्ठको कार्यकक्षमा पुग्छन्।
त्यहाँ खरेलले प्रश्न गर्छन्, 'मान्छे बसेको पैसा लिने तपाईंहरूको प्रक्रिया के हो?'
श्रेष्ठले जबाफ दिनुअघि क्यामरा बन्द गर्न आग्रह गरेको भिडिओमा देखिन्छ।
अर्का एक व्यक्तिले 'अनुगमनमा आएका सांसद' भन्छन्।
त्यसपछि श्रेष्ठले त्रिभुवन विमानस्थलसँगको सम्झौताअनुसार नै काम गरिरहेको स्पष्टीकरण दिन्छिन्।
'जति पनि पब्लिक आउनुहुन्छ, सबैलाई भित्र जान दिने हो भने कन्ट्रोल गर्न गाह्रो हुन्छ,' उनी भन्छिन्, 'त्यसैले भित्र बस्न ५० रूपैयाँ र १०० रूपैयाँ शुल्क लिने व्यवस्था गरेका हौं। ६५ वर्षभन्दा माथिका ज्येष्ठ नागरिक र ५ वर्षमुनिका बालबालिकालाई निःशुल्क छ।'
श्रेष्ठको यस्तो जबाफ सुनेपछि खरेल प्रश्न गर्छन्, 'यो गरेको कसले?'
श्रेष्ठ भन्छिन्, 'त्यो बेला त्रिभुवन विमानस्थलको मान्छे हुनुहुन्थ्यो।'
खरेल प्रश्न गर्छन्, 'त्रिभुवन विमानस्थलले गरेको हो?'
श्रेष्ठ जबाफ दिन्छिन्, 'विमानस्थल र हाम्रो सम्झौता अनुसार हो।'
सांसदहरूले टिप्पणी गर्छन्, 'तपाईंलाई जे मन लाग्यो, त्यो गर्नुभयो।'
श्रेष्ठले यात्रु लिन विमानस्थल आउने सर्वसाधारणलाई सुविधा दिन आफूहरूले ५० र १०० रूपैयाँ शुल्क निर्धारण गरेको बताउँछिन्।
खरेलसँगै गएका अर्का सांसदले अनुगमन क्रममा भेटेको एउटा घटना सुनाउँछन्।
'दुई जना बुढाबुढी हामीले भेट्यौं। जापानबाट छोरा आउँदैछ भनेर लिन आएका रहेछन्,' ती सांसद भन्छन्, 'हामीले अनुगमनमा आएका सांसद हौं भनेपछि उहाँहरूले यहाँ त पैसा लाग्ने रहेछ, नयाँ सरकार आएपछि केही होला भनेर आशा गरेको तर छोराछोरी...।'
ती सांसद बोलिरहँदा श्रेष्ठले बाहिर दुई तहमा नि:शुल्क बस्न कुर्सीको व्यवस्था गरिएको बताउँछिन्। शुल्क तिरेर भित्र बस्न अनिवार्य नभई स्वेच्छिक भएको उनको आसय थियो।
सांसद खरेल भने सम्झौताकै विषयमा प्रश्न उठाउँदै थप आक्रामक बन्छन्।
'पचास र सय रूपैयाँ लिने कन्ट्रयाक्ट (सम्झौतापत्र) कहाँ छ,' खरेल सोध्छन्।
श्रेष्ठ विमानस्थल कार्यालयसँग समन्वय नगरी व्यावसायिक कागजपत्र दिन नसकिने अडान लिन्छिन् र भन्छिन्, 'हाम्रो विमानस्थलसँग सम्झौता भएको हो। उहाँहरूसँग कुरा गर्नुहोस्।'
उनी यो पनि भन्छिन्, 'सफ्टवेयरबाट सबै कुरा सेयर हुन्छ। जानकारी दिएर, लेखेर सबै हुन्छ।'
त्यसपछि सांसदहरूले फेरि आगमन कक्षमा बसेर यात्रु कुर्न किन पैसा तिर्नुपर्ने भनेर फेरि प्रश्न गर्छन्।
'मान्छे बस्दाको कुरा होइन हजुर, त्यो च्वाइसेस (विकल्प) हो,' श्रेष्ठ भन्छिन्, 'कोही पनि भित्र नजान र नबस्न पनि सक्छन्।'
त्यसपछि सांसद खरेल यो विषय मिडियामा छरपस्ट पार्ने भन्दै उठ्छन्।
अनि 'मान्छे बसेको पैसा लिन मिल्छ?' भन्दै फेरि प्रश्न गर्छन्।
यति भनेर विमानस्थलको जग्गा नै सेटिङमा प्राप्त गरेको आरोप पनि लगाउँछन् र सोध्छन्, 'डकुमेन्ट ल्याउनुस् त।'
त्यसपछि उनी सिइओ श्रेष्ठतिर औंला तेर्स्याउँदै बोलेको भिडिओ देखिन्छ। उनले 'ठेक्का लिएको तपाईंहरूले हो कि होइन' भनेर श्रेष्ठलाई सोधेका छन्।
श्रेष्ठ भन्छिन्, 'रिसाएर, जंगिएर गर्नुपर्ने केही छैन।'
'तपाईं राम्रोसँग कुरा गर्नुस् न,' उनी सांसद खरेललाई भन्छिन्, 'तपाईं जंगिनु पर्दैन।'
खरेल सोध्छन्, 'राम्रोसँग भनेको कस्तो?'
श्रेष्ठले सांसद खरेललाई 'ब्यहोरा नभएको' टिप्पणी गर्छिन्।
मान्छे बसेको पैसा लिन अनुचित भएको तर्क गर्दै खरेल भन्छन्, 'तपाईंहरूको हो यो एयरपोर्ट?'
श्रेष्ठ जबाफ दिन्छिन्, 'हो नि त!'
त्यसपछि खरेल फेरि सोध्छन्, 'दिपक मल्होत्राको यो हो एयरपोर्ट?'
'हामीले ३० वर्षका लागि लिएका छौं,' श्रेष्ठ जबाफ फर्काउँछिन्, 'बुट (निर्माण, स्वामित्व, सञ्चालन र हस्तान्तरण) मोडलमा छ।'
खरेल भन्छन्, 'यो विषय सदनमा गज्जबले उठ्छ।'
अहिले सामाजिक सञ्जालमा भाइरल भिडिओको एक दृश्य।
सोमबार संघीय संसदको अर्थ समितिका सांसदहरू अनुगमनका लागि त्रिभुवन अन्तर्राष्ट्रिय विमानस्थल पुगेका थिए। सुरूआतमा उनीहरूले अध्यागमन क्षेत्रको अनुगमन गरेका थिए।
त्यहाँ बिल नकाटी कफी बिक्री गरिएको भेटिएपछि सांसदहरूले कर अधिकृतलाई एयरपोर्टमै डाकेर बिल जारी नगर्ने कफी सपलाई कारबाही गर्न निर्देशन दिए।
त्यसपछि केही सांसद विमानस्थलको पार्किङतर्फ लागे भने केही अराइभलको 'वेटिङ क्षेत्र' तर्फ लागे। रास्वपाका सांसद खरेल र अर्का एक सांसद वेटिङतर्फ गएका थिए।
त्यहाँ विदेशबाट आएका छोरा लिन आएका बुढाबुढीले ओत लाग्ने ठाउँमा बस्दा मात्र पनि ३ सय रूपैयाँ तिर्नुपरेको सांसदहरूलाई सुनाएका थिए।
त्यसपछि सांसदहरूले पैसा कसले उठाउँछ र कुन नियम अनुसार उठाइएको हो भनेर एयरपोर्टका कर्मचारीलाई सोधेका थिए।
ती कर्मचारीले नै एयरपोर्टको अराइभल कक्ष व्यवस्थपान गर्ने कम्पनी आइएमएसकी सिइओ चारू श्रेष्ठको कोठामा पुर्याएका थिए।
हामीले यो घटनालाई लिएर सांसद खरेल र सिइओ श्रेष्ठसँग कुरा गरेका छौं।
'मैले सिस्टम अनुसार नै पैसा उठाएको हो भने पनि कोसँग कतिमा ठेक्का पाउनुभयो, कागजपत्र ल्याउनुस्, हामी हेर्छौं भनेको थिएँ,' खरेलले सेतोपाटीसँग भने, 'उहाँले त्रिभुवन विमानस्थल कार्यालयसँग माग्नुस्, हामी दिँदैनौं भन्नुभयो।'
ठेक्का पाएको कम्पनीसँग पनि समझदारीको प्रति हुने भएकाले आफूले मागेको उनले बताए।
'हामी आधिकारिक रूपमा अनुगमनमा जाँदा पनि उहाँले कागजपत्र नदेखाउने भनेपछि म एग्रेसिभ भएँ। उहाँले यो सम्झौता अनुसार हामीले काम गरेका छौं भन्न सक्नुहुन्थ्यो। कानुनसम्मत छौं भन्न सक्नुहुन्थ्यो,' उनले भने।
सांसद खरेलले एयरपोर्टको प्रतीक्षा कक्षमा मान्छे बसेबापत पैसा लिने तरिका नै गलत भएको बताए।
पार्किङको छुट्टै पैसा लिने भएपछि मानिसका लागि पनि पैसा लिनु उपयुक्त नहुने खरेलले तर्क गरे।
'छोरा विदेशबाट आउँदा परिवारका सबै लिन जान्छन्। अनि पाँच जना जाँदा पाँच सय तिर्नुपर्ने हुन्छ,' खरेलले प्रश्न गरे, 'गाउँमा पाँच सय कमाउन दिनभर घोटिनुपर्छ। त्यहाँ निगरानी नपुगेकै देखियो।'
उनले एयरपोर्ट सरकारी जग्गामा बनेकाले मानिस बसेको पैसा लिन नपाउने जिकिर गरे।
अनुगमन क्रममा आफूहरुले एयरपोर्टमा व्यवसाय गर्नेहरुले वार्षिक हिसाब पनि ९ करोड ७५ लाख रूपैयाँ देखाउने गरेको आफूहरूले पाएको बताए।
'१० करोड तिरेको भए कर धेरै तिर्नुपर्ने भएकाले हिसाब समेत मिलाउने रहेछन्,' खरेलले भने, 'अनुगमनमा जाँदा जता हेर्यो त्यतै खाल्डो देखिँदो रहेछ। अनि भर्खरका युवा छौं रिस उठिहाल्छ। चुप लागेर बस्न पनि सकिँदैन रहेछ। मान्छेले बस्नका लागि पैसा तिरेको देख्दा माया लाग्छ। अनि मानवीय गुण हो पैसा उठाएको देख्दा रिस उठ्छ।'
आइएमएसका सिइओ चारू श्रेष्ठले भने सांसदहरू 'एक्कासि आफ्नो कोठामा आएर झोक्किएको देखेर अचम्म लागेको' बताएकी छन्।
'उहाँहरूले डकुमेन्ट माग्नुभएको थियो,' श्रेष्ठले भनिन्, 'यस्तो डकुमेन्ट त उहाँहरूले पत्र लेखेर त्रिभुवन विमानस्थल कार्यालयसँग माग्नुपर्ने हो।'
अहिले भाइरल भइरहेको भिडिओ देख्दा आफूलाई नहुनुपर्ने घटना भए जस्तो लागेको उनको भनाइ छ।
प्रतिनिधिसभाको अर्थ समितिमा विमानस्थल अनुगमनपछिको प्रतिवेदनमाथि छलफल हुन बाँकी छ।
