राष्ट्रिय स्वतन्त्र पार्टीले दलकी सचेतक क्रान्तिशिखा धिताललाई नै सचेत गराएको छ।
सामाजिक सञ्जाल फेसबुकमा लेखेको स्ट्याटसको विषयलाई लिएर पार्टीका प्रमुख सचेतक कविन्द्र बुर्लाकोटीले धिताललाई सचेत गराएका हुन्।
धितालले सामाजिक सञ्जाल फेसबुकमा 'सुकुम्बासी व्यवस्थापन' मा प्रश्न उठाएकी थिइन्।
कीर्तिपुरको होल्डिङ सेन्टरमा बसेका सुकुम्बासीलाई असार ८ गते उक्त स्थान छाड्न ५ दिनको अल्टिमेटम जारी गरिएको थियो। दोस्रोपटक एक साताको लागि होल्डिङ सेन्टर छाड्न सूचना जारी गरिएको थियो। असार २२ गते बिहानबाट खाना बन्द गरेपछि सुकुम्बासीहरू अलपत्र परेका थिए। त्यसपछि उनले असार २२ गते साँझ प्रश्न उठाएर आलोचना गरेकी थिइन्।
'आज सडकमा बगिरहेका सुकुम्बासीका आँसुले हामी सबैलाई पोल्नुपर्छ। सुकुम्बासीहरूको व्यवस्थापन अत्यन्तै आवश्यक थियो। तर, के यो हाम्रो वाचापत्र अनुसार भयो? के अभिभावकीय राज्य यस्तै हुन्छ? जुन संवेदनशीलता, योजना र जिम्मेवारीका साथ यो कार्य अघि बढाइनुपर्थ्यो, त्यसरी भएन,' उनले लेखेकी थिइन्, 'यसले जम्माजम्मी राज्यको कमजोरी र असक्षमतालाई मात्र उजागर गर्यो।'
धितालले स्ट्याटस लेखेको केही दिनपछि असार २६ गते राति होल्डिङ सेन्टर डुबानमा पर्दा सुकुम्बासीको विचल्ली भएको थियो। उनीहरूको खाद्यान्न, लत्ताकपडा र बालबालिकाहरूको किताबसम्म डुबानमा परेको थियो।
तर रास्वपाले भने व्यवस्थापनमा प्रश्न उठाउने सांसदमाथि नै अनुसशानको डन्डा चलाउन खोजेको खुलेको हो।
स्रोतका अनुसार प्रमुख सचेतक बुर्लाकोटीले सचेतक धिताललाई 'राज्यका संयन्त्रमा भन्नुको साटो फेसबुकमा लेख्नु ठिक भएन' भनेका थिए।
रास्वपाका एक नेताले भने लिखित स्पष्टीकरण सोध्ने तयारी भए पनि अन्तिममा मौखिक रूपमा सचेत मात्र गराइएको बताए।
'प्रमुख सचेतक र सचेतकहरू भनेको दलका पदाधिकारी हुन्, उनीहरूले सांसदले जस्तो आलोचना गर्नेभन्दा पनि समस्या समाधानका लागि पहल गर्ने हो,' ती नेताले भने, 'पार्टी सरकारमा पनि भएकाले दुई लाइन छ भन्ने देखिनु राम्रो भएन।'
स्रोतका अनुसार धिताललाई सचेत गराउनुको कारण भने पार्टी भित्रको दुई लाइन प्रतिस्पर्धा हो।
'धितालको स्ट्याटस कतै पार्टी सभापतिको लाइन अनुसार नै आयो कि भन्ने शंका प्रधानमन्त्री बालेन्द्र शाह नजिककाहरूले गरेका रहेछन्', स्रोतले भन्यो, 'त्यसपछि सभापतिले नै पनि यस्तो मेसेज जानुहुन्न भन्नुभएको रहेछ। अनि उहाँसँग सोधपुछ र छलफल भएको हो।'
सेतोपाटीले सांसद धिताललाई 'स्पष्टीकरण सोधिएको विषयमा जिज्ञासा राख्दा' उनले इन्कार गरिन्।
'मलाई स्पष्टीकरण सोधिएको भन्ने कुरा गलत हो,' धितालले भनिन्, 'मलाई पनि त्यतिबेला स्ट्याटस लेख्नुको साटो सरकारमा कुरा राखेको भए हुन्थ्यो भन्ने अहिले लागेको छ।'
रास्वपाभित्र सरकारको कार्यशैलीलाई लिएर सांसदहरू आलोचनात्मक रूपमा प्रस्तुत हुन थालेपछि सरकार र पार्टीबीच दूरी बढेका संकेत देखिएका छन्।
सांसदहरू प्रकाश पाठक, प्रकाशचन्द्र परियार, जगदिश खरेल (दोलखा) लगायतका सांसदले सरकारबारे प्रश्न उठाएका थिए।
यसरी सांसदहरू सरकारको आलोचनामा बोल्न थालेपछि प्रधानमन्त्री बालेन्द्र शाहले समेत पछिल्लो समय सांसदहरूसँग भेट्ने र छलफल गर्ने नीति लिएका छन्। तर उनले सांसदहरूले भने अझै प्रधानमन्त्रीसँग भेट्न पाएका छैनन्।
'प्रधानमन्त्रीलाई भेट्नु त कता हो कता,' रास्वपाका एक सांसदले भने, 'हाम्रो फोन उहाँको सचिवालयका मानिसले 'रेस्पोन्स' पनि गर्नुहुन्न।'
सांसद धितालले भने आफूले लेखेको स्ट्याटसलाई पार्टीको कोही नेतासँग जोड्न नहुने बताइन्।
'कुनै महिला सांसदले धारणा राख्यो भने उसलाई अर्को पुरूषसँग जोडेर हेर्ने गरिन्छ,' धितालले भनिन्, 'महिलाले स्वतन्त्र विचार राख्न सक्दैनन् भन्ने पुरूषवादी सोचका कारण शंकाका नजरले हेरिन्छ।'
रास्वपाबाट निर्वाचित सांसदहरूले सरकारको आलोचना गर्न थालेपछि प्रधानमन्त्रीको सचिवालयले समेत सांसदहरूलाई मन्त्रालयगत रूपमा रेस्पोन्स गर्ने नीति लिएको छ।
