गर्भपतन गराउने क्रममा मृत्यु भएकी गीता पाण्डेको घटनाको छानबिन गर्न नेपाल मेडिकल काउन्सिलका सदस्य डा. सम्राट पराजुलीको संयोजकत्वमा छानबिन समिति गठन गरिएको छ।
काउन्सिलले उक्त घटनालाई गम्भीरतापूर्वक लिँदै र मृतकका आफन्तको चाहना अनुसार घटनाको निष्पक्ष छानबिनका लागि ६ सदस्यीय समिति गठन गरेको हो।
समितिका सदस्यहरूमा मेडिकल काउन्सिलका विज्ञहरू स्त्री रोग तथा प्रसूति विशेषज्ञ प्रा. डा. पदमराज पन्त, डा. राजेन्द्र बस्याल, डा. अनुप पन्थी, कानुन व्यवसायी गोविन्द मरासिनी र नागरिक समाजको तर्फबाट दिनेश पाण्डे रहेका छन्।
काउन्सिलले उक्त समितिलाई घटनाको स्थलगत अनुगमन र निरीक्षण सहित घटनाको निष्पक्ष छानबिन गरी प्रतिवेदन उपलब्ध गराउन आग्रह गरेको छ।
काउन्सिलका रजिस्ट्रार डा. सतिश कुमार देवले बुटवल जस्तो क्षेत्रको स्वास्थ्य क्लिनिकमा गर्भपतन गराउने क्रममा गर्भवती महिलाको मृत्युको घटनाप्रति काउन्सिलको ध्यानाकर्षणमा भएको भन्दै स्थानीय प्रहरी प्रशासनको समन्वयमा उक्त घटनाको सत्य तथ्य छानबिन गरी यथार्थ विवरण सहितको प्रतिवेदन उपलब्ध गराउन समिति गठन गरिएको बताएका छन्।
साथै नेपाल मेडिकल काउन्सिल र व्यावसायिक आचरण तथा स्वास्थ्य समितिको निर्णयलाई पालना गर्न पनि आग्रह गरेका छन्।
पाल्पाको बगनासकाली गाउँपालिका वडा नम्बर २ घर भई हाल तिलोत्तमाको शंकरनगरमा बस्दै आएकी २९ वर्षीय गीताको गर्भपतन गराउने क्रममा सोमबार मृत्यु भएको थियो।
मृतकका पति प्रकाश पाण्डेका अनुसार गीताको १२ हप्ताको गर्भमा रहेको भ्रूण असामान्य रहेको भन्दै बुटवलको खत्री नर्सिङ होम, जोनल फार्मेसी र इन्दुलेखा क्लिनिकले गर्भपतन गराउने क्रममा उनको मृत्यु भएको बताएका छन्।
परिवार र आफन्तले गीताको मृत्यु तीन वटै स्वास्थ्य संस्था र त्यहाँका चिकित्सकहरूको लापरबाहीका कारण भएको भन्दै उनीहरूलाई कारबाही गर्न माग गरेका छन्। मृतकका परिवारले दिएको जाहेरीको आधारमा इलाका प्रहरी कार्यालय बुटवलले पाँच जनालाई पक्राउ गरेको जनाएको छ।
पक्राउ पर्नेहरूमा खत्री नर्सिङ होमका डा. डिबी खत्री र सन्ध्या बस्नेत, इन्दुलेखा क्लिनिकका खगेन्द्र पाण्डे र डा. सतिश रुपाखेती तथा जोनल क्लिनिककी निलम घर्ती मगर रहेका छन्। मृतकका परिवारले तीन वटै स्वास्थ्य संस्थामा मङ्गलबार साँझदेखि तालाबन्दी गरिदिएका छन्।
-1746009348.jpg)
