बस्ती भत्काएपछि सुरू भयो सुकुम्बासी राख्ने भनिएको अपार्टमेन्ट सरसफाइ (तस्बिरहरू)

कस्ता छन् भित्रका कोठाहरू, महानगरले बल्ल गर्‍यो निरीक्षण

नवीनबाबु गुरूङ

काठमाडौं, वैशाख १३

बागमती र मनोहरा किनारका बस्ती भत्काइएपछि त्यहाँका सुकुम्बासीहरूलाई सरकारले नागार्जुनमा राख्ने भनेको छ।

नागार्जुन नगरपालिका-१ इचंगुमा रहेको अपार्टमेन्टमा उनीहरूलाई राख्ने तयारी छ।

सरकारले यसको तयारी भने सुकुम्बासी बस्ती भत्काइसकेपछि मात्रै सुरू गरेको छ।

शनिबार नै थापाथली, सिनामंगल, गैरीगाउँ र शान्तिनगर क्षेत्रका सुकुम्बासी वस्ती भत्काइसकिएको छ।

त्यहाँका सुकुम्बासीहरूको विवरण संकलनको काम अझै सकिएको छैन। विवरण संकलनका लागि त्रिपुरेश्वरस्थित दशरथ रंगशालामा स्क्रिनिङ सेन्टर राखिएको छ।

आइतबार दिउँसोसम्म ३०० परिवारले आफूलाई सुकुम्बासी भनेर नाम दर्ता गराइसकेका छन्।

ती परिवारको उचित व्यवस्थापन भएको छैन। २०० जनाभन्दा बढीलाई कीर्तिपुरस्थित सत्सङ हलमा पठाइएको छ। सत्सङ हल भरिएपछि १०० जना भन्दा बढीलाई माछापोखरी र बसपार्कका होटलहरूमा राखिएको छ।

बस्ती खाली गर्नुअघि नै सरकारले सुकुम्बासीहरूलाई राख्ने भनेको अपार्टमेन्ट तयार पार्नुपर्नेमा अहिलेसम्म त्यो सकिएको छैन।

शुक्रबारसम्मै त्यहाँ रंगरोगन हुँदै थियो।

काठमाडौं महानगरले अझै आइतबार मात्रै त्यहाँका कोठाहरू निरीक्षण गरेको छ। महानगरकी कार्यवाहक प्रमुख सुनिता डंगोल दिउँसो उक्त अपार्टमेन्ट भवनमा निरीक्षणका लागि पुगेकी थिइन्।

प्रधानमन्त्री बालेन शाहका राजनीतिक सल्लाहकार असिम शाहले एक साताभित्र सुकुम्बासीहरूलाई त्यहाँ लैजाने भनेका छन्।

तीन वटा भवन बनाइएको उक्त क्षेत्रमा अहिले नगरपालिकाको वडा नम्बर १ कार्यालय, प्रहरी बिट, स्वास्थ्य कार्यालय, रानीवन नासीढोका खानेपानी तथा सरसफाई उपभोक्ता समितिको कार्यालय रहेका छन्।

एउटा भवनमा मानव सेवा आश्रमले ५४ जना वृद्धवृद्धाहरूलाई राखेको छ। अर्को भवन खण्डहर छ। सुकुम्बासी बस्ती भत्काएपछि मात्रै सरसफाइको काम भएको छ।

यी भवनहरू २०६९ मा बाबुराम भट्टराई प्रधानमन्त्री हुँदा बनाइएको थियो। त्यतिबेला सुकुम्बासी र न्यून आय भएकाहरूलाई राख्ने भनिएको थियो।

तर सुकुम्बासी बस्ती खाली गर्न भने त्यतिबेलाको सरकार पनि असफल भएको थियो। सुकुम्बासीहरूलाई राख्ने भनेपछि त्यहाँका स्थानीयहरूले पनि विरोध गरेका थिए।

त्यति बेला सुकुम्बासी परिवारलाई राख्न कस्तो अपार्टमेन्ट बनाउन उपयुक्त हुन्छ भनेर अध्ययन नै नगरी हचुवा पारामा बनाएको देखिन्छ।

एउटा फ्ल्याटमा एउटा कोठा, एउटा भान्सा र एउटा बाथरूम मात्रै छ। आमाबाबु, छोराबुहारी, नाति–नातिनासहितको परिवार एउटै कोठामा बस्न सम्भव हुँदैन।

त्यसकारण त्यतिबेला पनि सुकुम्बासीहरूले त्यहाँ बस्न इच्छा देखाएका थिएनन्।

सुकुम्बासीलाई यो अपार्टमेन्टमा राख्दा उनीहरूलाई स्वामित्व हस्तान्तरण गर्ने कि नगर्ने भन्ने पनि सरकारले खुलाएको छैन।

स्वामित्व हस्तान्तरण नभएपछि कोठा भाडामा लिएर बस्न गएजस्तो हुने भयो भनेर पहिले पनि धेरैले त्यहाँ जान अस्वीकार गरेका थिए।

तस्बिरहरूः

nagarjun-apartment-(21)-ink-1777195143.jpeg