दशरथ रंगशालामा सुकुम्बासीको विवरण संकलन भइरहेको छ।
थापाथली, सिनामंगल क्षेत्रको संरचना भत्काएपछि त्यहाँका सुकुम्बासीलाई शनिबारदेखि नै रंगशालामा ल्याएर विवरण संकलन भइरहेको छ।
शनिबारको तुलनामा आइतबार विवरण दर्ताका लागि आउनेहरूको संख्या बढेको छ।
थापाथलीबाट विस्थापित सुकुम्बासीहरू धेरैजसो यहाँ आइसकेका छन् भने सिनामंगल, गैरीगाउँ, शान्तिनगरबाट पनि आउने क्रम सुरू भएको छ।
आइतबार बिहानबाट सिनामंगल, गैरीगाउँ, शान्तिनगर क्षेत्रका बस्तीबाट आउनेको संख्या ह्वात्तै बढेको यहाँका अधिकारीहरू बताउँछन्।
साँझ ६ बजेसम्म ४३२ परिवार विवरण दर्ताका लागि उपस्थित भइसकेका छन्।
अधिकारसम्पन्न बागमती सभ्यता एकीकृत विकास समिति र उपत्यका विकास प्राधिकरणले उनीहरूको विवरण राखेका छन्।
समिति र प्राधिकरणले रंगशाला पश्चिमतर्फको कुनामा छुट्टाछुट्टै डेक्स राखेर फारम भराइरहेका छन्।
रंगशालामा छुट्टै डेस्क राखेर उनीहरूको स्वास्थ्य परीक्षण गर्ने र खाना खुवाउने काम भइरहेको छ। यसको समन्वय काठमाडौं महानगरपालिकाले गरिरहेको छ।
यसरी विवरण संकलन गरिसकेपछि भूमिहीन र आवासहीनहरूको व्यवस्थापन गर्न पाँचवटा होल्डिङ सेन्टरमा लगेर राखिने बागमती सभ्यता विकास परियोजनाका सामाजिक परिचालक कुमार सिंखडाले जानकारी दिए।
अहिलेसम्म विवरण टिपाएकामध्ये कुन परिवार कुन बस्तीबाट आएको भनेर छुट्टयाएर हेर्न बाँकी छ।
शनिबार फारम भराइएकामध्ये ३१ परिवारलाई कीर्तिपुर पठाइएको थियो।
कीर्तिपुरको सत्संग भवनमा सुकुम्बासी राख्न होल्डिङ सेन्टर बनाइएको छ। ३१ परिवार बसेको होल्डिङ सेन्टरको भरिएका कारण बाँकीलाई अन्यत्रै व्यवस्थापन गरिएको थियो।
तस्बिरहरूः
सबै तस्बिरः नेपाल फोटो लाइब्रेरी।
-1746009348.jpg)
