सुकुम्बासी बस्तीमा बसोबास गर्दै आएका यौनिक तथा लैंगिक अल्पसंख्यक समूदायलाई उचित व्यवस्थापना गर्न सरकारको ध्यानाकर्षण गराइएको छ।
सोमबार काठमाडौं महानगरपालिकाले सुकुम्बासीहरूको विवरण संकलन गरिरहेको ठाउँ दशरथ रंगशाला पुगेर ध्यानाकर्षण गराएका हुन्।
काठमाडौंमा यौनिक तथा लैंगिक अल्पसंख्यक समुदायका व्यक्तिलाई कोठा नदिने भएकाले सुकुम्बासी बस्तीमा बस्ने गरेको मायाको पहिचान नेपालका कार्यकारी निर्देशक सुनिलबाबु पन्तले जानकारी दिए।
'समुदायका मान्छेलाई जता पायो त्यता कोठा दिँदैनन्। त्यसले गर्दा सुकुम्बासी बस्तीमा डेरा लिएर बसेका थिए,' उनले भने, 'सामान समेत सार्न नपाइ भत्काइदिनुभएछ।'
उनका अनुसार थापाथली र मनोहराका सुकुम्बासी बस्तीमा यो समुदायका २०/२५ जना बस्दै आएका थिए। बस्ती भत्काएसँगै उनीहरू अलपत्र परेका छन्।
घर परिवारले स्वीकार गर्दैनन्। अहिले महिला पुरूष बसेको ठाउँमा उनीहरूलाई सहज हुँदैन। शौचालय र सुत्न समस्या हुने उनीहरू बताउँछन्।
'सुकुम्बासी बस्तीमा बस्नेहरूलाई पनि छुट्टै सेल्टरमा राख्नुपर्यो भनेर हामीले ध्यानाकर्षण गराएका छौं,' उनले भने, 'सँगसँगै उनीहरूलाई पनि सरकारले बस्ने व्यवस्थापन गरियोस्।'
उचित व्यवस्थापन नभएकाले सुकुम्बासी बस्तीमा बस्ने यौनिक तथा लैंगिक अल्पसंख्यक समुदायका मानिसहरू साथीहरूसँग बसिरहेका छन्।
-1746009348.jpg)
