भारतबाट हावाहुरीसहित वर्षा गराउने बादल नेपालतर्फ सरिरहेको जल तथा मौसम विज्ञान विभागले जानकारी दिएको छ।
मौसमविद् सरोज पुडासैनीका अनुसार भारतमा विकसित उक्त हावाहुरीसहित वर्षा गराउने बादल पश्चिमबाट नेपाल प्रवेश गर्ने क्रममा रहेको छ। हाल उक्त बादल कञ्चनपुर आसपास आइपुगिसकेको छ।
मौसम पूर्वानुमान महाशाखाले बुधबारका लागि विशेष बुलेटिन जारी गर्दै हावाहुरीसम्बन्धी चेतावनी दिएको छ।
महाशाखाले बुधबार अपराह्न ४ बजेदेखि बिहीबार बिहान ६ः४५ बजेसम्म तीव्र गतिको हावाहुरीको सम्भावना देखाएको छ।
‘भारतमा विकास भएको बादल क्रमशः नेपालतर्फ सर्दैछ। त्यो नेपालको कञ्चनपुर आसपास आइपुुगिसकेको छ। नेपालको पूर्वी भूभाग नजिकै पनि एउटा न्यूनचापीय प्रणाली बनेको छ। पश्चिमी न्यूनचापीय प्रणालीले बनाएको एउटा सिस्टम र देशको पूर्वी भागको अर्को सिस्टम एकापसमा जुध्दा कहिलेकाहीँ यस्तो हुने गर्छ। त्यसकारण विभागले विशेष बुलेटिन जारी गर्नुपरेको हो,’ पुडासैनीले भने।
उनका अनुसार विभागले तीव्र गतिको हावाहुरीको अनुमान गरेको छ। यसको तीव्रता २०–२५ मिटर प्रतिसेकेन्ड हुने पूर्वानुमान गरिएको छ। यसको तीव्रता ठाउँपिच्छे फरक हुने पुडासैनीको भनाइ छ।
महाशाखाले बुधबार सुदूरपश्चिमको कञ्चनपुर, डडेलधुरा र डोटी आसपासका जिल्ला, लुम्बिनी प्रदेशको बर्दिया, बाँके, दाङ, अर्घाखाँची, नवलपरासी आसपासका जिल्लामा हावाहुरीको जोखिम रहेको पूर्वानुमान गरेको छ।
गण्डकीको नवलपुर, बागमतीको चितवन आसपासका जिल्ला र मधेस प्रदेशका बारा, पर्सा र धनुषा जिल्लामा हावाहुरीको पूर्वानुमान छ।
कोशी प्रदेशमा झापा, मोरङ आसपासका जिल्लामा हावाहुरीको अनुमान गरिएको छ।
हावाहुरी चल्ने पूर्वानुमान गरिएको समयमा घरबाहिर हिँडडुल नगर्न, घरको झ्यालढोका राम्रोसँग बन्द गर्न, जस्तालगायतबाट बनेको छानो कमजोर छ भने किलाकाँटी ठोक्न, कसिलो बनाउन, घरबाहिर आगो नबाल्न, घरभित्र आगो बाल्दा पनि सावधानी अपनाउ राष्ट्रिय विपद जोखिम न्यूनीकरण तथा व्यवस्थापन प्राधिकरणले सतर्क गराएको छ।
त्यस्तै लड्नसक्ने कमजोर संरचना, अग्ला रूख, खम्बानजिक, बिजुलीको पोल, तारमुनि नबस्न भनेको छ। लत्रिएको बिजुलीको तार नछुन पनि प्राधिकरणले भनेको छ।
हावाहुरीले सामान उठाएर ल्याउने र चोटपटक लाग्ने जोखिम भएकाले चनाखो रहन पनि प्राधिकरणले सचेत गराएको छ।
मौसम पूर्वानुमान महाशाखाले बुधबार दिउँसो कोशी, मधेस, बागमती र गण्डकी प्रदेशको धेरै स्थानहरूमा तथा लुम्बिनी, कर्णाली र सुदूरपश्चिम प्रदेशको केही स्थानहरूमा मेघगर्जन/चट्याङ/असिना सहित मध्यम सम्मको वर्षा/हिमपातको सम्भावना रहेको बताएको छ।
कोशी र गण्डकी प्रदेशको पहाडी भू–भागका एक–दुई स्थानमा मेघगर्जन/चट्याङसहित भारी वर्षाको सम्भावना देखाएको छ।
बुधबार राति कोशी, मधेस, बागमती र गण्डकी प्रदेशको धेरै स्थानहरूमा तथा लुम्बिनी, कर्णाली र सुदूरपश्चिम प्रदेशको पहाडी र हिमाली भू–भागका थोरै स्थानहरूमा मेघगर्जन/चट्याङसहित मध्यम सम्मको वर्षा/हिमपातको सम्भावना रहेको बताएको छ।
लुम्बिनी र सुदुरपश्चिम प्रदेशको तराई भू–भागका एक–दुई स्थानमा मेघगर्जन/चट्याङ/असिनासहित मध्यम सम्मको वर्षा/हिमपातको सम्भावना रहेको बताएको छ।
कोशी, मधेश, बागमती र गण्डकी प्रदेशको पहाडी भू–भागका एक–दुई स्थानमा मेघगर्जन/चट्याङसहित भारी वर्षाको पनि सम्भावना रहेको छ।
-1746009348.jpg)
