भदौ २४ गते कास्की कारागारबाट फरार भएका व्यक्ति हत्या र लुटपाट आरोपमा पक्राउ परेका छन्।
बाग्लुङ गल्कोट नगरपालिका–९ मल्मका २९ वर्षीय सञ्जय विकलाई प्रहरीले वैशाख १५ गते काठमाडौंबाट पक्राउ गरी जिल्ला प्रहरी कार्यालय नवलपुरमा बुझाएको जनाएको हो।
केन्द्रीय अनुसन्धान ब्यूरो (सिआइबी)सहितको संयुक्त टोलीले उनलाई लुकेर बसेको अवस्थामा बैशाख १५ गते प्रहरीले नियन्त्रणमा लिएको हो।
अनुसन्धानका लागि उनलाई जिल्ला अदालत नवलपुरबाट ७ दिन म्याद थप भएको नवलपुर प्रहरी प्रमुख एसपी युवराज खड्काले बताए।
प्रहरीका अनुसार विक कास्की कारागारबाट भदौ २४ गते भएको सामूहिक कैदीबन्दी फरार घटनामा भागेका थिए। उक्त घटनामा ७७३ कैदीबन्दी फरार भएका थिए। जसमध्ये १ सय ३० जना अझै फरार छन्।
फरार रहँदै आएका विकले २०८२ चैत २३ गते नवलपरासी (बर्दघाट सुस्ता पूर्व)को देवचुली नगरपालिका–टाँगीकोट टोलमा ७५ वर्षीय जिउनराम थनेत र उनकी ७१ वर्षीया श्रीमती गुलबसनिया थनेतमाथि आक्रमण गरी सुनका गरगहना लुटेको आरोप छ।
टाउकोमा गम्भीर चोट लागेका जिउनरामको उपचारका क्रममा चितवनस्थित अस्पतालमा मृत्यु भएको प्रहरीले जनाएको छ।
यसअघि विक २०८० मंसिर ५ गते पोखराको नागढुंगास्थित एक होटलमा तनहुँ भीमादकी ३८ वर्षीया सुकु विकको हत्या प्रकरणमा दोषी ठहर भएका थिए।
अदालतले उनलाई २०८२ जेठ २७ गते जन्मकैद र ७० हजार रुपैयाँ जरिवानाको फैसला सुनाएको थियो। अनुसन्धानका क्रममा उनले ती महिलालाई होटलमा लगेर घाँटी थिचेर हत्या गरी गरगहना लुटपाट गरेको खुलेको थियो।
नवलपुरका प्रहरी प्रमुख एसपी युवराज खड्काका अनुसार पक्राउ परेका विकमाथि थप अनुसन्धानका लागि जिल्ला अदालतबाट ७ दिनको म्याद थप गरिएको छ।
अदालतको आदेशअनुसार उनलाई कास्की पठाउने वा नवलपुरमै राख्ने विषयमा निर्णय हुने उनले बताए।
प्रहरीले फरार कैदीबन्दीको खोजी तीव्र पारेको जनाएको छ।
गम्भीर अपराधमा दोषी ठहर भएका फरार कैदीबन्दीबाट सुरक्षा चुनौती बढेको भन्दै सुरक्षा संयन्त्रमाथि समेत प्रश्न उठिरहेका छन्।
-1746009348.jpg)
