काठमाडौं महानगरपालिकाले पशुपति क्षेत्रबाट सहयोगको आवश्यकता भएकाहरूको उद्धार गरेको छ।
मंगलबार काठमाडौं-४ तिलगंगामा होल्डिङ सेन्टर सञ्चालनमा ल्याएको हो। ३६ जनालाई पशुपति क्षेत्रबाट उद्धार गरी उनीहरूको वास्तविकता पहिचान गर्न होल्डिङ सेन्टरमा लगिएको महानगरले जनाएको छ। त्यसमध्ये ६ जना सेन्टरको पर्खाल नाघेर भागेका थिए।
महानगर, पशुपति क्षेत्र विकास कोष र मानव सेवा आश्रमले संयुक्त रूपमा होल्डिङ सेन्टर सञ्चालनमा ल्याएको हो।
कार्यवाहक प्रमुख सुनिता डंगोलले सेन्टरमा पुगेर पूर्वाधार, सुविधा, व्यवस्थापन र सहयोगको आवश्यकता भएकाहरूको अपेक्षाका विषयमा जानकारी लिएकी थिइन्।
‘हामी काठमाडौंलाई सहयोगापेक्षी मुक्त बनाउन नेतृत्व गरिरहेका छौं। सहरमा काम गर्न सक्ने व्यक्तिले श्रम गरेर खाने, श्रम बजारमा जान नसक्ने र दायित्व लिने कोही नभएकोको मानवोचित बसोबासका लागि महानगरपालिकाले व्यवस्था मिलाउनेछ। यो कामलाई सफल बनाउन व्यक्ति परिवार, साझेदार सबैको समन्वय आवश्यक छ। मिलेर काम गरौं,’ उनीहरूसँग कुराकानी गर्दै डंगोलले भनिन्।
उनले पारिवारिक पुनर्मिलन गराउनु नै पहिलो लक्ष्य रहेको बताइन्।
‘पारिवारिक पुनर्मिलन पहिलो लक्ष्य हो। असहाय र वेवारिसेलाई मात्र आश्रममा राख्ने हो,’ उनले भनेकी थिइन्।
उनले, बिरामीलाई उपचारको व्यवस्था मिलाउन निर्देशन दिएकी थिइन्।
कोषका कार्यकारी निर्देशक सुवासचन्द्र जोशीले, सेन्टरको पूर्वाधारलाई व्यवस्थित र सुरक्षित बनाउन कोषले काम गर्ने बताइन्।
उद्धार गरिएकामध्ये ४ जनामा मानसिक समस्या छ। १ जना ज्येष्ठ नागरिकलाई कुकुरले टोकेर घाइते बनाएको छ। उद्धारबाट व्हिलचेयर प्रयोगकर्ता र वैशाखी प्रयोगकर्तालाई समेत सेन्टरमा ल्याइएको मानव सेवा आश्रमका उपत्यका इञ्चार्ज कृष्ण पौडेलले जानकारी दिए।
उद्धार भएकामध्ये ६ जना महिला र बाँकी सबै पुरूष छन्।
उमेरका हिसाबले सबैभन्दा पाको उमेरको व्यक्ति ७८ वर्षको र सबैभन्दा कान्छो २५ वर्षको व्यक्ति छन्। ठेगाना हेर्दा सोलुखुम्बु, सर्लाही, मकवानपुर, साँखु, सुनसरी, मोराङ., बारा, महोत्तरी, खोटाङ्, धनकुटा, सुर्खेत, दोलखाका छन्।
-1746009348.jpg)
