काठमाडौंमा लुटेरा समूहमाथि सहासिक प्रतिकार गरेकी महिलालाई प्रहरी महानिरीक्षक दानबहादुर कार्कीले सम्मान गरेका छन्।
काठमाडौं महानगरपालिका–२४ तुछेनानी गल्लीस्थित नैना एण्ड ईशान ज्वेलर्समा पेस्तोलसहित लुटपाट गर्न पुग्दा साहसिक रूपमा प्रतिकार गरेकी सञ्जिता शाक्यलाई आइजिपी कार्कीले सम्मान गर्दै कदर पत्र प्रदान गरेका हुन्।
गत वैशाख १७ गते दुई जना व्यक्तिले पेस्तोल देखाई लुटपाट गर्ने उद्देश्यले आतंक सिर्जना गरेका थिए।
उक्त परिस्थितिमा काठमाडौं महानगरपालिका–२२ वटु निवासी शाक्यले आफ्नो ज्यानको पर्वाह नगरी साहसिक काम गर्दै लुटेराको प्रयास असफल बनाएकी थिइन्।
त्यसको कदर गर्दै आइजिपी कार्कीले बिहीबार नेपाल प्रहरी प्रधान कार्यालयमा आयोजित विशेष कार्यक्रममा उनलाई कदरपत्र प्रदान गरी सम्मान गरेका हुन्।
प्रहरीका अनुसार उक्त घटनामा संलग्न तीन जनालाई प्रहरीले पक्राउ गरिसकेको छ।
-1746009348.jpg)
