राष्ट्रिय परीक्षा बोर्डले माध्यामिक शिक्षा परीक्षा (एसईइ) को नतिजा सार्वजनिक गर्ने तयारी गरेको छ।
नतिजाको सम्पूर्ण काम सकिएकाले सोमबार अपराह्न ५ बजे बोर्डको बैठक बोलाइएको छ।
उक्त बैठकपछि नतिजा सार्वजनिक गर्न डेमो गरिने राष्ट्रिय परीक्षा बोर्डका परीक्षा नियन्त्रक टुकराज अधिकारीले जानकारी दिए।
'बैठकपछि नतिजा सार्वजनिक गर्न डेमो हेर्छौं,' नियन्त्रक अधिकारीले भने, 'डेमो सफल भएमा त्यसको दुई/तीन घन्टापछि अर्थात बेलुकी ८/९ बजेतिर रिजल्ट सार्वजनिक हुन्छ।'
उनका अनुसार प्राविधिक कुनै समस्या भएमा नतिजा आज सार्वजनिक नहुन पनि सक्छ।
सरकारले यसपालिदेखि एसइई परीक्षाको नतिजा एक महिनाभित्रै सार्वजनिक गर्ने घोषणा गरे अनुसार वैशाख २९ गतेको मिति तय गरिएको छ।
विगतमा करिब तीन महिना लाग्दै आएको एसइई नतिजा प्रधानमन्त्री बालेन शाह नेतृत्वको सरकारले पहिलो पटक एक महिनामा ल्याउन लागेको हो।
यसअघिका वर्षमा एसइईको नतिजा जेठ अन्तिमदेखि असार पहिलो साता सार्वजनिक गरिन्थ्यो।
चैत १९ देखि देशभर सञ्चालन भएको एसइई परीक्षा चैत २९ गते सकिएको थियो।
यस वर्ष पाँच लाख १२ हजार ४२१ जना विद्यार्थी सहभागी थिए। तीमध्ये नियमिततर्फ ४ लाख ४१ हजार ५६६ जनाले र ग्रेड वृद्धितर्फ ७० हजार ८५५ जनाले परीक्षा दिने भएका छन्।
त्यसमा दुई लाख ५७ हजार ६१३ छात्रा, दुई लाख ५४ हजार ८०१ छात्र र अन्य सात जना छन्।
