सुर्खेत प्रहरीले विद्युतीय माध्यमबाट अनलाइन जुवा (बेटिङ) खेलाएको आरोपमा एक जना शिक्षक सहित तीन जनालाई पक्राउ गरेको छ।
पञ्चपुरी नगरपालिका–९ का ३९ वर्षीय शिक्षक महेन्द्रकुमार बोहरा, सोही ठाउँका ४२ वर्षीय व्यापारी यामलाल विक र होटलका सञ्चालक ४४ वर्षीय डम्बरबहादुर विक पक्राउ परेका हुन्।
सुर्खेतका प्रहरी प्रवक्ता डिएसपी मोहनजंग बुढथापाका अनुसार पक्राउ परेकामध्ये प्रारम्भिक अनुसन्धानबाट शिक्षक बोहराले ६ महिनाको अवधिमा करिब २ करोड ४६ लाख बराबरको बैंकिङ कारोबार गरेको देखिएको छ।
उनले विभिन्न बैंकमा ६ वटा खाता खोली ठगीमा संलग्न भएको प्रारम्भिक अनुसन्धानबाट खुलेको डिएसपी बुढथापाले बताए।
त्यस्तै, यामलालको पनि विभिन्न बैंकमा ५ वटा खाता खोली खाता दुरूपयोग गरी शंकास्पद कारोबार गरेको र होटल सञ्चालक डम्बरले विभिन्न बैंकमा ९ वटा खाता खोली त्यसको दुरूपयोग गरी शंकास्पद कारोबार गरेको प्रारम्भिक अनुसन्धानबाट खुलेको छ।
उनीहरूको बारेमा थप अनुसन्धान जारी रहेको डिएसपी बुढथापाले जानकारी दिए।
सामाजिक सञ्जाल इन्टरनेट माध्यमबाट ठगी गर्ने मनशायले प्रलोभनमा पारी हारजित हुने गरी अनलाइन जुवा (सट्टेबाजी) खेलाउने उद्धेश्यले विभिन्न बैंकहरूमा खाता खोली दुरूपयोग गरी शंकास्पद कारोबार गरेको गोप्य तथा प्राविधिक सूचनाका आधारमा अनुसन्धान गर्दा शिक्षक बोहरा सहित तीन जना पक्राउ परेको डिएसपी थापाले बताए।
इलाका प्रहरी कार्यालय बाबियाचौरबाट खटिएको प्रहरी टोलीले बुधबार उनीहरूलाई नियन्त्रणमा लिएर अनुसन्धान थालेको प्रहरीले जानकारी दिएको छ।
प्रहरीले पक्राउ परेका तीनै जना विरूद्ध बैंकिङ कसुर, कसुर, जुवा (सट्टेबाजी) तथा सम्पत्ति शुद्धीकरण लगायत कसुरमा प्रारम्भिक चरणमा अनुसन्धान थालिएको जानकारी दिएको छ।
