सिन्धुली खुर्केट इलाका प्रहरी कार्यालयको हिरासतमा मृत फेला परेका श्रीकृष्ण विकको घटना छानबिन समितिले इन्स्पेक्टरसहित दुई जनालाई कारबाही गर्न सिफारिस गरेको छ।
राष्ट्रीय प्रहरी प्रशिक्षण प्रतिष्ठानका डीआइजी दिनेश आचार्य नेतृत्वको छानबिन समितिले इन्स्पेक्टरसहित दुई जनालाई विभागीय कारबाही गर्न सिफारिस गरेको हो।
छानबिन समितिले वैशाख २९ गते घटनाको प्रतिवेदन बुझाएको केन्द्रीय कार्यालयका प्रवक्ता डीआइजी अविनारायण काफ्लेले बताए।
'हामीलाई प्राप्त भएको प्रतिवेदन गृह मन्त्रालयमा पठाइएको छ,' उनले भने, 'बाँकी अनुसन्धान भइरहेको छ।'
उक्त प्रतिवेदनमा इलाका प्रहरी कार्यालय खुर्कोटका इन्स्पेक्टर वसन्त भुजेल र घटना भएको दिन हिरासत कक्षमा ड्युटीमा रहेका अर्का एक जना प्रहरीलाई विभागीय कारवाही गर्न सिफारिस गरेको स्रोतले सेतोपाटीलाई जानकारी दिएको छ।
वैशाख ७ गते साँझ प्रहरी कार्यालयको हिरासतको शौचालयमा सिन्धुलीको सुनकोशी गाउँपालिका-३ का २३ वर्षीय श्रीकृष्ण विक मृत फेला परेका थिए।
उनलाई वैशाख ३ गते प्रहरी वृत्त सातदोबाटोबाट खटिएको टोलीले नियन्त्रणमा लिएर सिन्धुली पठाएको थियो।
उनीविरूद्ध बालिकामाथि बलात्कार गरेको प्रहरीमा उजुरी छ।
उनका परिवारले भने बालिका र श्रीकृष्ण दुई वर्षदेखि प्रेममा रहेको र चैत २८ गते विवाह गरेर ल्याएको बताउँदै आएका छन्।
