शान्ति, नैतिकता र सचेतनाको सन्देश फैलाउँदै अमेरिका र भारतमा हजारौँ माइल पैदल यात्रा गरेका बौद्ध भिक्षुहरूको टोली लुम्बिनी आइपुगेको छ।
अन्तर्राष्ट्रिय शान्ति दूतका रूपमा परिचित ‘अलोका’ नामक कुकुरको साथमा भियतनामी भिक्षु भन्ते पन्ना कारा नेतृत्वको टोली आइतबार साँझ लुम्बिनी आइपुगेको हो।
यसअघि यो टोलीले सन् २०२२ मा भारतमा ३४ सय किलोमिटर शान्ति पद यात्रा गरी शान्ति, नैतिकता र सचेतनाको सन्देश लिएर बौद्ध तीर्थ स्थलहरूको भ्रमण गरेका थिए।
सोही यात्राका क्रममा उनीहरूसँग भारतको कलकत्तादेखि बोध गया जाने क्रममा सडकमा बेवारिसे उक्त कुकुर जोडिएको थियो।
आफूहरूसँग सयौं माइलको पैदल यात्रामा साथ नछाडि सँगै हिँडेपछि उनीहरूले उक्त कुकुरलाई अलोका नाम दिएका थिए। अहिले उक्त कुकुर शान्ति दूतका रूपमा चिनिन्छ।
सोही कुकुरको साथमा भिक्षु पन्ना काराको टोलीले अहिले विश्वका विभिन्न मुलुकहरूबीच युद्ध भइरहेको बेला अमेरिकामा ११२ दिन टेक्ससदेखि वासिङ्टनसम्म २३ सय माइल (३७ सय किलोमिटर) खाली खुट्टा पैदल यात्रा गरेका थिए।
अमेरिकाका १० भन्दा बढी राज्य तथा श्रीलंका र थाइल्यान्डको पदयात्रा पूरा गरी गत सोमबार भारत आइपुगेको उक्त टोली आइतबार साँझ रुपन्देहीको बेलहिया नाका हुँदै लुम्बिनी आइपुगेको हो।
भिक्षु पन्ना काराको टोली यस अघि सन् २०२२ मा पनि बुद्ध जन्मस्थल लुम्बिनी र कपिलवस्तुको भ्रमण गरेका थिए। आइतबार लुम्बिनी आएको टोलीलाई लुम्बिनी विकास कोष, अन्तर्राष्ट्रिय भिक्षु महासङ्घ र लुम्बिनी सांस्कृतिक नगरपालिकाले स्वागत गरेका थिए।
लुम्बिनी आइपुगेपछि भन्ते पन्नाकाराले पवित्र मायादेवी मन्दिरको दर्शन र पवित्र पुष्करिणी पोखरीको परिक्रमा गरी विश्वमा अशान्ति र युद्धको चपेटामा परेका नागरिकहरूको कल्याणका लागि विशेष सुत्त पाठ र ध्यान गरे।
-1781486235.jpeg)
लुम्बिनीमा मायादेवी मन्दिरको दर्शन गरेपछि भिक्षु पन्नाकाराले मानिसले आफ्नै अन्तर मनमा हेर्न सक्यौँ भने पनि शान्ति प्राप्त गर्न सक्ने बताए। उनले आफू शान्ति, नैतिकता र सचेतनाको अभियानमा लागेपछि आफ्नो जीवनमा धेरै परिवर्तन आएको बताए।
‘म इन्जिनियरबाट बौद्ध भिक्षु बन्नु मेरो जीवनको पूर्ण परिवर्तन थियो। पैसा कमाउने व्यस्त जीवनबाट सेवा, बुद्धका शिक्षाको अभ्यास र शान्तिको सन्देश फैलाउने यात्रामा आएपछि सबै कुरा बदलिएको छ,’ उनले भने।
उनले बुद्धको जन्मभूमिमा पाइला टेक्दा सयौं माइल पैदल यात्रा गरेको सम्पूर्ण थकान मेटिएको बताए।
‘संसारलाई शान्तिको मार्ग देखाउने गौतम बुद्धको जन्मस्थलमा बसेर विश्व शान्तिको कामना गर्न पाउनु मेरो यात्राकै सबैभन्दा ठूलो उपलब्धि हो,’ उनले भने। उनले ‘अलोका’केवल कुकुर मात्र नभई आफ्नो यात्राको जीवित प्रकाश भएको बताए। आफूहरूसँगै ध्यान बस्ने र महिनौंसम्म पदयात्रा गरिरहेको अलोकाको अनुशासन र प्रेमले मानिसहरूलाई अहिंसाको मार्गमा लाग्न प्रेरित गरिरहेको उनले बताए।
भिक्षुहरूको टोलीलाई लुम्बिनीमा स्वागत गर्दै अन्तर्राष्ट्रिय भिक्षु महासंघका अध्यक्ष भिक्षु मैत्री महास्थवीरले अलोका र भिक्षु पन्ना कारा सहितको यो भ्रमणले लुम्बिनीलाई र गौतम बुद्धको शिक्षालाई विश्वभर फैलाउन मद्दत पुग्ने विश्वास व्यक्त गरे।
उनले यसअघि संयुक्त राष्ट्रसंघका ६ जना महासचिवले लुम्बिनीको अवलोकन गरिसकेको उल्लेख गर्दै विश्वका धेरै मुलुक युद्धको चपेटामा परिरहेको बेला फेरी लुम्बिनीबाटै विश्वभर शान्तिको सन्देश फैलाउनुपर्ने बताए।
लुम्बिनी सांस्कृतिक नगरपालिकाका कार्यवाहक प्रमुख कल्पना हरिजन र लुम्बिनी विकास कोषका वरिष्ठ अधिकृत ज्ञानिन् राईले भिक्षुहरूको भ्रमणले लुम्बिनीको प्रचार प्रसारमा सघाउ पुर्याउने बताए।
लुम्बिनीको अवलोकनपछि भिक्षुहरूको टोली आज काठमाडौं गएर राष्ट्रपति रामचन्द्र पौडेलसँग भेट गर्ने कार्यक्रम तय भएको लुम्बिनी विकास कोषले जनाएको छ।
-1781486235.jpeg)
-1781486235.jpeg)
-1781486235.jpeg)
