शिक्षा तथा खेलकुद मन्त्री सस्मित पोखरेलले सुकुम्बासी बस्तीबाट विस्थापित भई होल्डिङ सेन्टरमा रहेका बालबालिकालाई शैक्षिक सामग्री वितरण गरेका छन्।
मन्त्री पोखरेलले सोमबार भक्तपुरको खरिपाटी र बोडेस्थित होल्डिङ सेन्टरमा रहेका बालबालिकाहरूलाई शैक्षिक सामग्री वितरण गरेका हुन्।
कीर्तिपुरस्थित होल्डिङ सेन्टरमा बाढी पसेपछि त्यहाँ बसोबास गर्दै आएका परिवारलाई अहिले भक्तपुरका दुई ठाउँमा स्थानान्तरण गरिएको थियो।
स्थानान्तरण गरेसँगै आइतबार ६ जना मन्त्रीहरू होल्डिङ सेन्टरमा पुगेर सरकारले सुकुम्बासीहरूलाई भूमि दिलाउने आवश्वासन दिएको थियो।
साथै, सोमबार फेरि मन्त्री पोखरेल होल्डिङ सेन्टरमा पुगेर आवश्यक शैक्षिक सामग्री वितरण गरेका हुन्।
मन्त्रालयका अनुसार बालबालिकाहरूलाई झोला, कापी, कलम, किताब लगायत सामान दिइएको छ। त्यस्तै, उनले खेलकुदका सामग्री पनि वितरण गरेका हुन्।
मन्त्री पोखरेलसँगै शिक्षा तथा मानव स्रोत विकास केन्द्रका प्रतिनिधिहरू पनि होल्डिङ सेन्टरमा पुगेका थिए।
बालबालिकाहरूले आवश्यक किताब समेत माग गरेका छन्। त्यसको विवरण संकलन गरिएको छ।
मन्त्रालयका अनुसार बोडेस्थित १८ जना र खरिपाटीमा २१ जना बालबालिका छन्।
उनीहरू पहिले बल्खु, गैरीगाउँ, बबरमहल, बिजुलीबजार, थापाथली, नयाँबानेश्वर, तीनकुने लगायतका ठाउँमा पढ्दै आएका थिए।
बस्ती भत्किएपछि कतिपय विद्यार्थीहरू अन्यत्र विद्यालयमा पढ्न थालेका छन्।
मन्त्री पोखरेलको सचिवालयका अनुसार मंगलबारदेखि बसबाट ती बालबालिकालाई विद्यालय पुर्याउने भएको हो।
‘अहिलेलाई बसमार्फत उहाँहरू पढ्दै आएको विद्यालयमा लग्ने/ फर्काउने काम हुन्छ। पछि आवश्यक परे उहाँहरूलाई पायक पर्ने विद्यालयमा स्थानान्तरण गर्न पनि सकिन्छ,’ सचिवालय सदस्यले भने।
