शैक्षिक परामर्श व्यवसायी तथा यस क्षेत्रसँग सम्बन्धित विभिन्न संघ–संस्थाले शिक्षा, विज्ञान तथा खेलकुद मन्त्रालयले लागू गरेको ‘शैक्षिक परामर्श, भाषा शिक्षण तथा तयारी कक्षा (सञ्चालन तथा व्यवस्थापन) नियमावली, २०८३’ का केही प्रावधानप्रति असन्तुष्टि जनाउँदै चरणबद्ध आन्दोलनको घोषणा गरेका छन्।
संयुक्त प्रेस विज्ञप्ति जारी गर्दै व्यवसायीहरूले नियमावली सरोकारवालासँग पर्याप्त छलफल नगरी लागू गरिएको दाबी गरेका छन्।
व्यवसायीहरूले पत्रकार सम्मेलन गरी नियमावलीका केही व्यवस्था अव्यावहारिक रहेको, निजी क्षेत्रलाई निरूत्साहित गर्ने तथा शैक्षिक परामर्श व्यवसाय सञ्चालनमै समस्या सिर्जना गर्ने बताएका छन्।
घोषित कार्यक्रमअनुसार असार ३२ गते सबै सदस्यले आफ्ना कार्यालयमा कालोपट्टी बाँधेर नियमित सेवा सञ्चालन गर्दै विरोध जनाउने छन्। त्यसपछि साउन १ गते बिहान ११ बजेदेखि ११ः३० बजेसम्म कार्यालय अगाडि प्लेकार्डसहित शान्तिपूर्ण प्रदर्शन गरिनेछ। हात्तिसार–पद्मोदय मोड, बागबजार–पुतलीसडक चोक र डिल्लीबजार–पुतलीसडक चोक क्षेत्रमा प्रदर्शन हुने तथा काठमाडौं उपत्यकाका अन्य स्थानका व्यवसायी पनि पुतलीसडकमा सहभागी हुने जनाइएको छ।
व्यवसायीहरूले यी कार्यक्रमपछि पनि सरकारले वार्ता वा समस्या समाधानका लागि पहल नगरे सबै सदस्यले आफ्ना कार्यालयको चाबी सम्बन्धित जिल्ला प्रशासन कार्यालयमा बुझाई अनिश्चितकालीन आन्दोलनमा जाने चेतावनी दिएका छन्।
उनीहरूले अनुमतिपत्रको अवधि एक वर्षको सट्टा पाँच वर्ष बनाउन, शैक्षिक मेला तथा सेमिनारमा अनावश्यक स्वीकृति लिने व्यवस्था हटाउन, विदेशी शैक्षिक संस्थाबाट प्राप्त हुने सेवा शुल्कसम्बन्धी प्रतिबन्ध हटाउन, धरौटी, क्षतिपूर्ति, ग्रेडिङ तथा दोहोरो विवरण पेस गर्नुपर्ने व्यवस्था पुनरावलोकन गर्न माग गरेका छन्। साथै, नियमावली संशोधनअघि सरोकारवालासँग औपचारिक छलफल गर्न पनि सरकारसँग आग्रह गरेका छन्।
संयुक्त विज्ञप्तिमा आन्दोलनका सबै कार्यक्रम शान्तिपूर्ण, लोकतान्त्रिक र कानुनसम्मत हुने उल्लेख गर्दै सरकारसँग संवादमार्फत समाधान खोज्न आफूहरू सधैँ तयार रहेको जनाइएको छ।
