क्यारेबियन प्रिमियर लिग (सिपिएल) टी-२० क्रिकेट प्रतियोगितामा बिहीबार राति हुने सेन्ट लुसिया र ट्रिन्बागो नाइटराइडर्सको फाइनल खेलपछि विजेताको टुंगो लाग्दैछ।
सिपिएल संघारमा पुग्दा नेपाली क्रिकेटप्रेमीका लागि पनि चासोको विषय बन्यो। किनभने नेपालका युवा लेग स्पिनर सन्दीप लामिछानेले लगातार तेस्रो पटक सिपिएल खेले। तेस्रो सिजनमा तेस्रो फरक टिम जमैका तलावाजबाट खेल्दा सन्दीपले आफ्नो प्रभाव देखाए।
सन्दीपले जमैकाको मुख्य बलरको भूमीका निर्वाह गरे। उनले समूह चरण र सेमिफाइनल गरी जमैकाबाट सबै ११ खेल खेले। बलिङ गरेका सबै खेलमा उनीले आफ्नो बलिङ स्पेल पूरा गरे।
खासगरी सन्दीपले जमैकाका लागि मध्यओभरमा बलिङको मोर्चा सम्हाले। जमैकाले विपक्षीको रन रोक्न चाहिरहेको बेला सन्दीप प्रभावकारी देखिए।
वर्षाले विथोलिएको एक खेलमा सन्दीपले बलिङ गर्न पाएनन् भने ट्रिन्बागोविरुद्धको सेमिफाइनलमा विकेट लिन सकेनन्। बाँकी ९ खेलमा सन्दीपले विकेट लिन सफल भए। सन्दीपले सिजनको सिपिएलमा ११ खेलमा १२ विकेट लिए।
सन्दीप जारी सिपिएलको सर्वाधिक विकेट लिने बलरको सूचीमा अफगानिस्तानका मोहमद नाबीसँग संयुक्त रूपमा पाँचौ स्थानमा रहे।
सन्दीपले सिपिएलको पहिलो खेल सेन्ट लुसियाविरुद्ध खेले। जमैकाले जित हात पारेको खेलमा सन्दीपले चार ओभर बलिङ गर्दै एक विकेट लिए। उनले पहिलो खेलमा २३ रन दिएका थिए।
ट्रिन्बागोविरुद्धको दोस्रो खेलमा पनि सन्दीपले एक विकेट लिए। उनले ३० रन खर्चिएको यो खेलमा जमैका पराजित भयो।
गुयनाविरुद्धको तेस्रो खेलमा सन्दीपले उत्कृष्ट बलिङ गरेका थिए। उनले २ विकेट लिँदा केवल ८ रन दिएका थिए। चौथो खेलमा पनि जमैकाले गुयनाविरुद्ध नै खेलेको थियो। यो खेलमा सन्दीपले १ विकेट लिँदा केवल १२ रन दिएका थिए।
जमैकाले पाँचौ खेल बार्बाडोससँग खेलेको थियो। यो खेलमा सन्दीपले १६ रन दिँदा २ विकेट लिन सफल भएका थिए। छैटौं खेलमा सेन्ट किट्सविरुद्ध सन्दीपले २७ रन दिएर २ विकेट लिएका थिए।
ट्रिन्बागोविरुद्ध भएको सातौं खेलमा सन्दीपले १ विकेट लिएका थिए भने २० रन खर्चिएका थिए। सेन्ट किट्सविरुद्धको आठौं खेल वर्षाले अबरुद्ध भएको थियो। वर्षाले खेल अवरुद्ध हुँदा जमैकालाई फाइदा पुगेको थियो। जससँगै जमैका सेमिफाइनलमा पुग्न सफल भएको थियो।
नवौं खेल बार्बाडोसविरुद्ध सन्दीपले १ विकेट लिँदा २६ रन खर्चिए। सेन्ट लुसियाविरुद्धको समूह चरणको अन्तिम खेलमा सन्दीपले १ विकेट लिँदा २० रन दिए। त्यसपछि ट्रिन्बागोविरुद्धको सेमिफाइनलमा भने सन्दीप विकेटबिहीन बने।
सन्दीपले सिपिएलमा ११ खेलमा १० इनिङमा कूल ४० ओभर बलिङ गरे। उनले एक मेडन राखे भने कुल २११ रन दिए। सिजनमा उनको उत्कृष्ट प्रदर्शन २ विकेट लिएर ८ रन दिनु बन्यो। उनको औषत १७.५८ हुँदा इकोनोमी ५.२७ रह्यो।