भारतविरुद्धको तीन खेलको एकदिवसीय सिरिजअन्तर्गत पहिलो खेलमा घरेलु टिम अस्ट्रेलियाका दुई ब्याट्सम्यानले शतक प्रहार गरेका छन्।
शुक्रबार सिड्नीमा टस जितेर पहिले ब्याटिङ थालेको अस्ट्रेलियाका कप्तान आरोन फिञ्च र स्टिभ स्मिथले शतक प्रहार गरेका हुन्।
फिञ्च र स्मिथको शतकमा अस्ट्रेलियाले ६ विकेटको क्षतिमा ३७४ रनको विशाल योगफल जोडेको छ। यो भारतविरुद्ध कुनै पनि टिमले जोडेको तेस्रो ठूलो योगफल हो।
खेलमा फिञ्चले १२४ बलमा ११४ रन र स्मिथले ६६ बलमा १०५ रन जोडे। फिञ्चले ९ चौका र २ छक्का हिर्काउँदा स्मिथले ११ चौका र ४ छक्का हिर्काए।
ओपनर डेभिड वार्नरले ६९ रनको योगदान दिए। उनले ७६ बलमा ६ चौका हिर्काए। ग्लेन म्याक्सवेलले १९ बलमा ५ चौका र ३ छक्काको मद्दतमा जोडेको ४५ रन पनि अस्ट्रेलियाको विशाल योगफलको आधार बन्यो।
बलिङमा भारतका मोहमद सामीले ३ विकेट लिए। जसप्रित बुमराह, नवदीप शैनी र युजभेन्द्र चाहलले समान १-१ विकेट लिए।
३७५ रनको लक्ष्य पछ्याउँदै भारतले ब्याटिङ गर्नेछ।
भारतीय टिमले अस्ट्रेलिया भ्रमणका दौरान तीन खेलको एकदिवसीय सिरिजका साथै तीन खेलको टी–२० सिरिज र दुई खेलको टेस्ट सिरिज खेल्नेछ।