नेपाल प्रिमियर लिग (एनपिएल) को फाइनल खेल हेर्न दर्शकको उत्साह अभूतपूर्व देखिएको छ।
टिकट बिक्री खुला गरिएको केही मिनेटभित्रै सबै टिकट सकिएपछि नेपाल क्रिकेट संघ (क्यान) ले यसलाई नेपाली क्रिकेटप्रतिको जनविश्वास र समर्थनको प्रमाणका रूपमा व्याख्या गरेको छ।
क्यानले जारी गरेको प्रेस विज्ञप्तिअनुसार मंसिर ५ गते हुने एनपिएल फाइनलका लागि टिकट बिक्री खुला गर्दा एकैपटक ७ लाखभन्दा बढी प्रयोगकर्ताले टिकट खरिद गर्न प्रयास गरेका थिए। अत्यधिक ‘कन्करेन्ट रिक्वेस्ट’ का कारण प्रणालीमा ठूलो चाप परेको थियो। तर मैदानको दर्शक क्षमता सीमित भएकाले बिक्री खुला भएलगत्तै केही मिनेटमै सम्पूर्ण टिकट ‘सोल्ड आउट’ भएको संघले जनाएको छ।
अघिल्ला खेलहरूमा जस्तै फाइनल खेलका लागि पनि दर्शकको चासो असाधारण रूपमा बढेपछि टिकट पाउन नसकेका हजारौं समर्थक निराश बनेका छन्।
संघले टिकट खरिद गर्न नपाई असुविधामा परेका दर्शकप्रति क्षमायाचना गर्दै क्रिकेट प्रेमीहरूको निरन्तर साथ र समर्थनप्रति आभार व्यक्त गरेको छ।
टिकट प्राप्त गर्न नसकेका समर्थकलाई आधिकारिक डिजिटल प्लेटफर्ममार्फत फाइनल खेल प्रत्यक्ष प्रसारण हेरी प्रतियोगितालाई समर्थन गर्न पनि संघले आग्रह गरेको छ।
तर क्यानले फाइनल खेलको कति टिकट बिक्रीमा राखेको थियो भन्ने खुलाएको छैन। साथै कति जनाले टिकट खरिद गरेका थिए भन्ने विवरण दिएको छैन।