कतारमा जारी एसिया कप राइजिङ स्टार्स मेन्स क्रिकेट प्रतियोगितामा भारत ‘ए’ ले नेपाललाई ३३३ रनको विशाल लक्ष्य दिएको छ। दोहास्थित वेस्ट इन्ड पार्क इन्टरनेसनल क्रिकेट स्टेडियममा टस हारेर पहिले ब्याटिङ गरेको भारत ‘ए’ ले निर्धारित ५० ओभरमा ९ विकेट गुमाएर ३३२ रन बनाएको हो।
भारतका कप्तान तिलक वर्मा र विकेटकिपर ब्याटर कुमार कुशाग्रले शतकीय इनिङ्स खेले। तिलकले ११३ बलमा ६ चौका र ४ छक्काको मद्दतले १०७ रन बनाए। कुशाग्रले १०२ बलमा १० चौका र ५ छक्का प्रहार गर्दै ११७ रन जोडे।
भारतको सुरुवात भने राम्रो हुन सकेन। ओपनर वैभव सूर्यवंशी र अभिषेक शर्मा सस्तैमा आउट भए। आक्रामक ब्याटिङका लागि परिचित सूर्यवंशी ३२ बलमा २६ रन बनाएर पवन सर्राफको बलमा बोल्ड भए। अर्का ओपनर अभिषेक १३ बलमा ९ रन बनाएर नन्दन यादवको बलमा मयान यादवबाट क्याच आउट भए।
त्यसपछि आएका आयुष बडोनी पनि ७ बलमा २ रन बनाएर ललित राजवंशीको बलमा दीपक डुम्रेबाट स्टम्पिङ भए। भारतले ७ ओभरभित्रै ३६ रनमा २ विकेट गुमाएको थियो भने १०.३ ओभरमा सूर्यवंशी आउट हुँदा ४२ रनमा तीन विकेटको अवस्थामा पुगेको थियो।
त्यसपछि तिलक र कुशाग्रले भारतीय इनिङ्स सम्हाले। यी दुईबीच चौथो विकेटका लागि २०६ रनको महत्वपूर्ण साझेदारी भयो। ४२.२ ओभरमा कुशाग्र आउट भएपछि यो साझेदारी टुटेको थियो। उनलाई ललित राजवंशीले बोल्ड गरेका थिए।
कुशाग्र आउट हुँदा भारतको स्कोर २४८ रन थियो। त्यसको केही समयपछि ४५.२ ओभरमा तिलक पनि नन्दन यादवको बलमा कुशल भुर्तेलबाट क्याच आउट भए। उनले चौथो विकेटका रूपमा २८३ रनको अवस्थामा मैदान छाडे।
अन्तिम ओभरहरूमा भारतले तीव्र गतिमा रन जोड्यो। रिंकु सिंहले ७ बलमा ९ रन बनाएर सन्दीप लामिछानेको बलमा आउट भए। सूर्यांश शेड्गेले आक्रामक ब्याटिङ गर्दै १४ बलमा अविजित ३६ रन बनाए। उनले ४ छक्का र एक चौका प्रहार गरे।
शाहबाज अहमद ८, विप्रज निगम शून्य र हर्षित राणा १ रनमा आउट भए। नेपालका लागि ललित राजवंशी, सन्दीप लामिछाने र नन्दन यादवले समान ३ विकेट लिए। पवन सर्राफले एक विकेट हात पारे।